***************************************************************************** Títulu: Pa’ siñor cura de Ribadesella Autor: Cipriano Álvarez Pedrosa Fonte: Obra ensin asoleyar. Trescripción de testos manuscritos (principios del s. XX) Orixinal: http://books.google.es/books?id=_O49SdiWc5MC&pg=PA90&dq=Asturianu&hl=es&sa=X&ei=UkvNU9CLMoed0QXK3YHwCQ&ved=0CB4Q6AEwADge#v=onepage&q=Asturianu&f=false ***************************************************************************** Non hay fiesta en sin tarasca y en sin que toque un gaiteru; pa que non falte esti aquí faré de músicu vieyu, y anque desafine un pocu y estorbe en esti conciertu, con el roncón de la gaita y soplando en el punteru voy a acompañar el cantu que hoy me sal del garigüelu y que tien por estribillu, o por remate de versu: “Siñor Cura, Siñor Cura, Yá puede usté tar contentu”. Les rapaces más guapines, De flores un garapiellu, Gayasperes, melguerines, Güeyos de color de cielu, (dexo fora a les mios fíez Metides en esti empeñu) Como xanes afanoses, en sin folgar un momentu, entamar esta fiesta a fin de atrapar dineru pa les obres empezades d’esi magníficu templu que orgullosu va a adornar la plaza vieya del pueblu.