ORACIÓN DE LA FONTE

 

Virxen del prau, 

nun dexes la nuesa ánima 

sumise nel infiernu 

onde’l cuerpu paga 

un tributu enquivocáu.

Si he tarazame un mechón, 

que nun s’ufierte al mármole ciegu 

del divinu Homeru. 

Sinón nel ara vexetal 

de dalgún dios veceru. 

En cuantu a Ella 

callar la boca ye lo que convién.

Mio bien, ¿qué cosa plena se sustancia 

ente les mios y les tos voltures 

en llegando al cumal de les cordures 

que conxela l’aliendu y mos lu llancia

más p’allá, a la fonda abegosa chancia 

d’un querer d’infinitu, perescures 

les llendes esnidioses nes qu’afures? 

Sol exe relluciente d’una albancia

ingrientos y mayaos pies y manes 

danme la razón. Pos nel intre sales 

derrompiendo los vieyos afilvanes

al anchu rueldu de les coses vanes, 

esbíllesme les bones de les males 

y en besándonos tórnesles reales.