*****************************************************************************

Títulu: Les cancionines d'Asturies

Autor: Luis Aurelio

Fonte:

*****************************************************************************

Cantares de mio Asturies, guapos cantares,
que tenéis el arume de los pomares,
y el collor de les lluces de l´alborá,
que sabéis a sidrina de los llagares
y a besinos de moza recién casá.

Cantarinos que canten los llabraores.
y la moza que suaña con sos amores
y la madri qu´al neñu duerme na cama.
¡Canciones galanes y ensoñaores
que canten los rapazos baxo la lluna!

Cantares que nel  tayu  canta´l mineru,
y que pelos caminos el carreteru
entona  mientres suenen los esquilones,
¡Cantares que nel fuelle traí el gaiteru
pa que llenen de gozu los corazones!

Cantarinos que salen de les quintanes,
Y que tienen mermullos de les fontanes
cuando a beber s´acerquen los paxarinos.
¡Qué gusto da l´oyelos peles mañanes
porque suenen melgueros y melosinos!

Asturianaes bravíes, que pa los cielos
van saliendo gozoses de los gargüelos
mientres salta nel vasu la sidriquina:
alleranes, vaqueres... ¡Pa quitar duelos 
non hai como los cantares de la tierrina!

Non son como les coples d´otros llugares,
que  fallen de tristeces y de pesares
poniendo en sos estrofes mil amargures,
les coplines d´Asturies son rellumares
qu´allumbren con el fuego de sos ternures.

El cantar de mío Asturies ye rescamplante,
ye ricu en sos tonaes y ye arrogante
como´l  que foi pa Cuba y golviose indianu,
ye amorosu, sencillu... ¡Ye tantu cante,
que nel cielu yá entonen en asturianu!.