***************************************************************************** Títulu: La ’sfoyaza’ (El Progreso de Asturias, 20 de xunetu del 1922) Autor: Francisco González Prieto ‘Pachu’l Peritu’ Fonte: Testos en Llingua Asturiana N’el Progreso de Asturias de La Habana Orixinal: http://books.google.es/books?id=YG7iIOjbbd0C&pg=PA9&dq=Asturianu&hl=es&sa=X&ei=T03NU7DtE8it0QX52YDYDQ&ved=0CDgQ6AEwBTgo#v=onepage&q=Asturianu&f=false ***************************************************************************** Salté pe la portiella, dí un xiblín, Metime ’na tená com’ un gurriau, Foi contintu pal llar faciendu ruin, Y taben toos allí ’nllenando ’l papu. Bebí un poqueñín d’ agua pel vedrín, Dempués llimpié ’l focicu con un trapu Y sentem a cenar en un rincón Un bon platu de fabes con llacón. Col bocau ’na boca fo al corral En busca d’ un palín por si quiciaz; Pero ’spanté los gües p’ hacia ’l portal Y dixi yo al ganao: ¡xatu atrás! Garré la vaca pinta pel cornal, Di un golpe a la portiella y fixo: ¡plas! Co la furia foi dar fasta la llosa Y nun creu planteme ya ’n ca Rosa. Al llegar yo plasmé con tanta xente Rodiaos al montón de les panoyes Falando i trabayado guapamente Sentaos ente fueyes i fenoyes. Yo di les güenes noches mui prudente, Y díxome Pinín:–¿Clemente, oyes? Tenemos entamá una folixa Pa dempués, qu’ ahora Rosa nos aguixa. Senteme sol montón ’na picorota Y mirando pal llar, dixi: ¡ah Ruperta! Que cocian les castañes e ’na pota Que ya tan toos co la boca abierta. –El diañu se sobió a la cocorota, Dixo Rosa, que ’ntraba pe la puerta: –A ’sfoyar i enriestrar, non teis con calma, Pos el que ’nriestre más gana la palma. Desque tal cosa dixo, con remangu Comiencen a ’sfoyar, pero ¡qu’ aprisa! Yo al velos forfugaos ente ’fangu Non pudi menos d’ españar de risa: Entamé trafucar zángulo mangu, Dempués púnxeme ’n mangues de camisa, Y taben sin xurxir toos callaos, Cad’ un col so montón mui aplicaos. Apurriendo panoyes a los mozos Les moces, i arricando barba i fueyes, Diben elos texéndolos en trozos Con xunchos, payes, triences i guedeyes. Yo ’scondí les mios riestres pe los pozos, Más ríense de min vieyos i vieyes; Y al espatarrangame ’n metá ’l corru, Diz. Vallente:–¡xuasus! Ahí ta ’l del gorru. Cad’ un en so montón diba poniendo Les panoyes pelaes que ’nriestraba, Y diben les mesories acreciendo, Mas lo mió, nin crecía nin menguaba. Barrunto que de min se taben riendo Porque ya la llabor se yos ’cababa: Y andaba yo rodando ’nte los tueros Como ’n pelos de gochu los reyeros. Mentanto qu’ arroxaren la foguera Pa facer el mangüestu, fo ’scurriendo: Planté ’l pote metanos la filera, Y en sin falar danqué fuimos comiendo. Pasó de mano ’n mano la puchera. Coló de boca ’boca i foi cayendo Per gargüelos, barrigues i paxellos, La sidre que moyaba a toos ellos. Ahí vien utru paxan de corbates Fumiando i tienriquines de callentes, Y dan ñueces i ablanes mui barates Pa tou ’l que quixés rucá los dientes: Anden pudieres per illí sin pates Poniendo les molleres tan llucientes, Que mialma, co la sidre, si non caen Dalgunos, ya nos saben lo que faen. Entamose depués la xugareta Comenzando pol xuegu la zapata; Cuando toa la xente taba quieta Diome ’na ’spalda un co la ’lpargata: Miro al reor, desmango la chaqueta, Y corriendo tres d’ él, garrei la pata; Plantelu ’n metá ’l corru i aguantó La ñube de zapatos que i cayó. Delantre del corral, el xiringuelu Blincaba pe la gaita i pandereta, Y bailaben los mozos en un vuelu Co les moces; la mía taba quieta. Espatuxaben tanto ya pel suelu, Qu’ a la postre perdieron la chabeta; Y bailamos yo i Rosa con saleru Los puntos revesaos del punteru. Sudoriento de tantu reblincar, Fatigaos d’ afechu i amoriaos, Sentámonos un poco a galantiar, Y llovía la sidre allí a xarraos. Daben les doces, l’ hora de marchar; Siete dis d’esfoyaza van cuntaos, Por fin hoy tuvo bono ¡mialma, mialma! Que nun cuntaba yo llevá la palma. Ramoncicu, Colás, Xico, Vicente, Pin el Tereu, Xacinto, Fabricianu, Antonón el Maruxu, Lluis, Vallente, Xuan el Bobu i Ustaquio ’l mio paisanu, Toos barrachos, diz un al utru: ¡tente! Más un apigazó ’tras d’ un manzanu: Los demás ya terciaben la montera Chando ixuxús metá la carretera. Despidime tamién yo del gaiteru, Y tevi con Rosina un peacín Deliciosu pa min que soi ronseru, Fasta que dixo: ¡marcha, Clementín! Dixei adiós, fuxí mui gayaspertu Y taba co los otros ya ’n camín: Llevamos pa so casa toes les moces Y fuimos pa la ñuestra dando voces. Yo, zámpeme ’na cama, ’ché un bon sueñu, Suañé lo que que t’acabo de cuntar: Que cantaba i bailaba mui risueñu Co la mió Rosa: i basta de falar, Qu’ aquí, lletor, suañando, non soi dueñu De la pluma que quier ya descansar: Si quies rite, comer, beber en traza, No tienes más que dir pa la ’sfoyaza. Pachu’l Peritu