*************************************************************

D.Enrique García-Rendueles:

"La rueca"


FONTE:

"Los nuevos bablistas" (1925)
(Enrique García Rendueles)


Respétase la grafía orixinal.

***********************************************************************




LA RUECA
	
N' arca rebilicoquiada
Hebo guardada la rueca,
Onde filara so vida
La santa y piadosa güela.
Allá pelos años mozos,
Cabo l' arroxada lleña,
Dempués d' echadu 'l rosariu
Filó d' amores la freba,
Metanto que xelu y ñeve
Abaxaben de la sierra,
Y canturriando El Galán
D' esta villa y Doña Enxendra,
Entamaba la fusada
Que corazones allegra.
Dimpués, amestando penes,
Apiegaba cola llengua
El filu rotu exmesando
Deprisa, exmesa qu' exmesa;
Y, á par xustaba 'l roqueru
De sedes y llentexuelas, 
El fusu revolotiaba
Allegre porque s' enllena,
Como l' abeya ente flores,
Pa dar cumplida cadexa.
Diba 'l filu lluengu y bonu,
Y la vida bona y Iluenga
Ansí pasaba exmesando
Ora pasín, ora apriesa.
Y cuando 'l sol poco á poco, 
Mortiguada la foguera, 
Con lluciquines rosades 
Valle y montes encapiella, 
Sentadina na quintana 
Mirólu fuxir l' agüela; 
Y enos dedinos cual gayos 
Duna parra seroñega, 
Fo quedando adormecía, 
Fo descansando la rueca; 
Qu' hebo guardá cual riliquia 
Pa que los míos fíos la ufrendan 
A los ñetos, y filando 
Un cerru de bona mena 
El llino semao na vida 
Sía fusada nas estrellas.