*****************************************************************************

Títulu: La igualdá non ye eso

Autor: El Nieto de Mingolino

Fonte: Poemes N'asturianu 1910-1912 (Escritu por Gaspar Muñiz Arias)

Orixinal: http://books.google.es/books?id=7d_VBzcciCQC&pg=PT22&dq=Asturianu&hl=es&sa=X&ei=ZR_HU6LuIuq40QXE1IG4BQ&ved=0CDkQ6AEwBA#v=onepage&q=Asturianu&f=false

*****************************************************************************

Non m’acuerdo quien dixo
Que yera la igualdá moza sin rixo,
Por que la ñuez non yera
En fegura y sabor como la pera.
Todo eso que dixo tá bien dicho
Si se miren les coses
Po la parte d’afuera d’algún nicho
Sin cuidase d’entrar au tán les foses
Pa discutir el caso
Ye mester salir por campo raso,
Y falar en concencia,
Pos si ye de monada non tien ciencia.
Tá bien que algún fartuco
Non i-apetezca ver al que tien fame
Y que diga muy cuco, Que lo de la igualdá ye cosa infame.
Ta bien que dixés eso, 
Pos yera del monton de l’abundancia, 
Y son los q’al progreso
Lo llamen el potaxe sin sustancia;
Pero fale ufano
Y al mió ver en sin xuicio, 
Del rétulo más güeno y más humano,
Ye baxar de cabeza’l precipicio.
Nadie dixo que yera
Lo mesmo que la parra, la figuera,
Nin ye lo mesmo el monte
Que les agües que vierte cualquier fonte; 
Nin lo mesmo ye’l pito
Que los cuernos picudos d’un cabrito,
Nin la cresta d’un gallo
Ye lo mesmo q’el rabo d’un caballo…
Querer facer les coses
Iguales en fegura
Ye querer que de zuecos salguen roses
O que saquen de fierro, la mestura.
Igual naceu desnudo, 
Famiento y en sin cencia,
El fíu del peludo
Q’el fíu del siñor de l’Excilencia.
Igual cuatro tapinos
Los cubre e’ nel pozo
Al fíu del criau de los Molinos
Q’al fíu del Marqués del Tentemozo.
Igual los fay natura
Al fíu del mandón como al plebeyo.
Lo mismo p’al nacer, la sepoltura
Yos da les mesmes ropes’ nel pelleyo.
La igualdá de los probes
Que tienen tres o cuatro rapazucos
Non ye comer les sobres
Que dexen los que fienden de fartucos.
Si la tierra d’abondo
Pa que todos comamos a fartamos
¿Pa qué dalgunos tá tan fondo
Que, cuasi, de famientos naleamos?
La igualdá de vevir
Ye lo qu’apetecemos los probinos
Y non ye la igualdá que fay sofrir
Con cargues del Gobierno a les pueblinos.
La igualdá de la ley
Non cuela ‘nesta tierra de llambiones
Que yo de sobra sey
Que fayen d’ella un trapo los mandones
La igualdá non se merca
E’nes tiendes, palacios, nin congresos;
La igualdá tá más cerca:
Tá dentro de nosotros, tá nos sesos,
Tá dentro del esclavo
Del taller, de la mina y el terruño;
Allí ta la igualdá de cabo a rabo
Mercada ‘nes espaldas con un cuño.
Los probes que trabayen tienen fame
Y quieren fartucase ‘niste suelo;
Al rico no-i-da más q’el pueblo clame
Llibertá, igualdá, paz y consuelo.
La igualdá de los probes
Que tienen tres u cuatro rapazucos
Non ye comer les sobres
Que dexen los que fienden de fartucos.