CIERTES MERCEDES 
 

[Robert Graves]

 

¿Ha paecer que toa satisfaición, 

agora, ye mera mitigación 

d’un cursu aceutáu?
 

¿Hemos tar, n’adelantre, agradecíos

a que los guardies, anque dañinos,

seyan tardiegos de pies y tiesta?
 

¿A que de nueche podamos tresnar

enriba del catre maera

un delgáu cobertor?
 

¿A que l’agua gafo

nel puercu tanque

mos afuegue la sede?
 

¿A que la xamuscada y detestable

comedera seya tovía tragable

pa nós, famientos?
 

¿A que’l carceleru censor

dexe una carta a la selmana?

(Podíemos plumiar: “tamos bien”).
 

¿A que con cuidiáu y paciencia

nun tengamos la esperiencia

de la celda de castigu?
 

¿A que cada nueva indignidá

fraye’l cuerpu namás

acoricando al espiritu

con un escuru, altivu méritu?

 

(De Poemes y tornes)