************************************************************* Pepín de Pría. "Obres Completes" (Poesía) FONTE: A.S.A.R. El Príncipe de Asturias"(#) Respétase la grafía orixinal. ********************************************************************** Anxelín q'a vesitamos traite la Reina a Xixón, roxín como la panoya, guapiquín como la flor que nun pumar de raneta la primavera pintó..., Bien venidu seas, mio neñu, rixu de mio corazón, esperanza de mio tierra y beyura de mio amor... ¿ Vienes a ver istes fiestes que se faen en Xixón? ¿Son bones? ¿eh? Mialma sonlo. El Monte Piedá tiró la casa pela ventana, y fexo bien, como hai Dios: inda ye poco pa ti, rixu del mio corazón. Has de dir a la mio aldea que tó festexate yo, y amás, amás, so la copa del arboliu miyor to dati una llambionada como enxamás non coló pe los llabios d'una reina. Ye un sete de llambedor, miel virxen que ti arreciende a les roses de Somió, y colleren les abeyes nos romerales en flor, y un puñadín de mirándanos que 'l besu l´alba esfreció con chipines d'orbayada que rellumen como'l sol. Has de venir; que ti tengo abeyáu allí un rincón fechu de fueya de roses y claveles de Somió, tou pa tí, roxín del alma, rixu del mio corazón, esperanza de mio tierra y beyura del mio amor: y si t'abondara pocu llévame a min, porque tó namorada de tos güeyos que son la gracia de Dios.