IX va contar con una candidatura unitaria liderada por Zapico

|
Ovidio Zapico

Delia Campomanes ocupa'l númberu 2.

El plazu pa la presentación de candidatures n'Izquierda Xunida (IX) pa les eleiciones del 28 de mayu pesllóse con una única llista presentada, qu'agora tien que recibir la confirmación de la Coordinadora, prevista mañana. Ovidio Zapico, diputáu y coordinador xeneral del partíu, va encabezar la llista.

Nel 2019, cuando IX se presentó xunto con IAS na coalición Asturies pela Izquierda, algamando dos escaños, Zapico ocupó'l númberu 2, con Ángela Vallina como candidata a la presidencia del país. Naquella ocasión hebo trés candidatures a les primaries: la de la castrillonense, la de Ramón Argüelles y la de Carmen Conde.

Agora Zapico va liderar la candidatura d'IX con Campomanes, conceyala d'Urbanismu, Obres y Tresporte, como compañera. Fernando Díaz Rañón, Arantxa Carcedo, Oscar Miranda y Llarina González son otros nomes d'una llista que pieslla Laura González, medaya d'Asturies 2023.

"Recueye y reflexa un poco lo que ye y siente la sociedá asturiana", considera Zapico sobre la candidatura. "Tenemos un millón de razones pa trabayar y pa que na llexislatura próxima con Izquierda Xunida garanticemos la estabilidá, el progresu, la defensa del mediu ambiente y la xusticia social n'Asturies", apunta'l coordinador xeneral, que rescampla que la llista de consensu amuesa "el bon momentu pol que traviesa la nuesa organización n'Asturies, nun periodo marcáu por la estabilidá na que tolos dirixentes d'Izquierda Xunida Asturies, ensin esceición, xugamos un papel mui responsable".

Contador Estadistiques