Entamar l’alderique, construir alternatives

Xicu Ariza's picture
Taxonomy upgrade extras: 
Ya pasó’l 7 de xunu y la resaca eleutoral vien mui dura pa toos aquellos que vivimos, pensamos y actuamos naguando por unes polítiques alternatives a les que’l circu mediáticu y la clase política mos quieren vender día sí y día tamién.
 
La finada campaña eleutoral bien pudo ser n’Asturies el guión d’una traxicomedia onde nun faltó de ná y sobraron demasiaes coses. Quiciabes nesti país préstanos abondo “La vida de Bryan” con eso del Frente Popular de Judea y el Frente Judaíco Popular, pero les comedies meyor dexales nel cine porque mos vienen enriba los thrillers psicolóxicos.
 
Los resultaos eleutorales fueron l’ensayu xeneral de lo que va llegar: mayor avance de les polítiques conservadores y neolliberales, retrocesu de los drechos de los trabayaores, más homexeneidá nel discursu dominante, desencantu social xeneral pa cola política, negación de les señes d’indentidá de los pueblos…. Toos somos conscientes d’ello; ye hora de dexar de caleyar a cuatro pates pa entamar a dar pasos eficaces que planteen una rempuesta madura al diluviu que mos vien enriba.
 
Munchos fueron los ciberalderiques plantegaos a lo llargu d’esta campaña sobre una obsesiva xuntanza. Munches les actuaciones qu’echaben per tierra eses reflexones. Pero al marxen del pasáu y mirado al futuru ye necesariu qu’esta resaca eleutoral mos lleve por nuevos caminos estratéxicos y d’actuación.
 
Partamos de los fechos y de la realidá. El pueblu y la izquierda asturiana nun ye mayoritariamente nacionalista. Poco sumaríen dos sigles si nun esiste una conciencia nacional ente la izquierda y la población. Pero más se podría facer si, adaptándonos a la realidá sociopolítica d’Asturies, sumárase la fuercia d’esi movimientu obreru asturianu combativu y los sos ámbitos d’aición; una izquierda crítica desencantada condenada tamién al “guetu” si nun toma otros caminos estratéxicos.
 
Siendo reales hai qu’añadir tamién qu’una completa unidá de les diferentes organizaciones que formen la denominada izquierda alternativa asturiana baxo una única sigla ye daqué que nun lo van compartir mayoritariamente nin organizaciones, nin militantes, nin votantes. En mayor o menor medida se tien un apreciu a unes sigles que representen una estratexa y un discursu políticu trabayáu durante años.
 
Entos ¿Qué plantegar?
Si bien ye ciertu qu’esisten diferentes proyeutos políticos, tamién ye verdá qu’una serie de persones y sigles vienen compartiendo dende años atrás abondos espacios n’estremaes actividaes polítiques y sociales. Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística….
 
Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos….
Los citaos son dalgunos exemplos d’una llarga llista de causes qu’axunten. Causes reivindicaes con mayor o menor protagonismu y con unes u otres estratexes, pero a la fin toos ellos puntos ideolóxicos compartidos polos diferentes ámbitos y que xeneren puntos d’alcuentru na so defensa.
 
Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?
 
Unes candidatures que garanticen la independencia e identidá propia de los proyeutos particulares de cada una de les sigles que la formen; qu’axunten a partíos políticos, movimientos sociales y xente a nivel individual en base a unos principios asumibles por toos y que nun causen exclusión ente les diferentes sensibilidaes de la izquierda.
 
En definitiva: unes candidatures d’unidá popular con una estratexa práutica y eficaz que despierte la ilusión y la confianza ente toles persones con ciertes aspiraciones sociales y polítiques en común, que nun signifiquen la desaparición de les ya existentes y estremaes sigles y coles que facer un trabayu responsable y diariu saliendo del “guetu”.
 
Propuestes constructives
La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.
 
Crear conciencia, sumar fuercies y xenerar confianza e ilusión na población. Tomar contautu cola xente con propuestes reales en base a los principios ideolóxicos comunes y llegar a unes instituciones que pueden non ser el fin p’algamar les nueses aspiraciones, pero sí un importante mediu por conquistar pa poder trabayar y construir alternatives.
 
Queden dos años de trabayu pa materializar esta propuesta. De la voluntá de les persones que formen les colectividaes y d’una actuación responsable en comuña depende demostrar que los enfrentamientos ente compañeros tan bien pal patiu del colexu, pero qu’asina políticamente el camín ye más duru, esclusivu y frustrante.
 
Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.
 
Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.
Xicu Ariza Fernández,

11 de xunu del 2009

Comentarios

 
Bon articulo Xicu , quédome con una frase :
Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.
 
Esti ye'l camín, entame a militar nel Ensame Nacionalista Astur, allá pelos años ochenta (fai mas de Vente años), nesti tiempu vi de too, xente que yera de los mas radical entós y acabo nel PP o PSOE o IU. El casu ye que n'actualidá tamos como tamos y el país y la cultura del país tan a piques de desapaecer.
Fai falta un periodu de reflexón como dices, pero d'esi periodu de reflexón tien de salir un proxectu unitariu del nacionalismu asturianu, qu'ilusione a la sociedá y que seya capaz de trabayar a comuña con otros sectores de la sociedá que sin ser nacionalistes, vean con bien el trabayar a comuña con nos, en definitiva yo diria-y al escepticu y desilusionau lo siguiente:
 
Nun lo faigas por Xuan Xosé nin por Carmona , nun lo faigas por Marcos Abel nin por Arturu Bermeyu , ni  tan siquiera lo faigas por Nacho Llope nin por Faustino Zapico nin por Valledor nin por Palacios  FAILO POR TI , FAILO POR ASTURIES , FAILO POL FUTURU DEL TO PAÍS , demuestra a los que colaron a otros proyectos , que ye posible , que se puede facer una alternativa política asturiana axeitada a les necesidaes del pueblu asturianu
 
Xicu, namas que me queda felicitavos pola idega de facer una xuntanza esin sectarismos (nun va ser xera facil, vencer mieos, rocees personales) pero si se quier facer algo positivo abra qu'arreblagar por encima de tolos pilancos que se pongan nel camín.
 
Yo comprométome a trabayar nesta xera.
 

Xilón, con tolos respetos, eso que me dices ye "más de lo mesmo", son los argumentos, calcaos, de los cuatro fatos que tábamos ilusionaos cola Coalición Asturiana de 1991 que yá sabemos como acabó, la Coalición y los sos protagonistes. Independientemente de too ello, nun se puede tar más desallegáu de la realidá asturiana que la xente que ve nesti artículu non "un camín" sinon "esi ye'l camín": repito, esto namás val p'autoconsumu internu, enxamás pa ilusionar a un mínimu siginificativu d'asturianos a facer nada nin a creer en nada. Siento dicilo asina y pido disculpes pero paezme que cai tan de caxón que nun puedo dexar d'asustame del inmensu argayu qu'hai ente los pensamientos nobles, nun digo que non, y los de la cásique totalidá, non yá de la sociedá asturiana en xeneral, sinon, mesmamente, de la más allegada y con más simpatíes ve l'asturianismu.

Gabis

Nun me queda claro si les alternatives a construir se van ciñir namás qu'al ámbitu de la denominada izquierda alternativa o si se van tender tamién pontes hacia l'asturianismu interclasista como se fixere hai años colos alcuerdos ente'l PAS y l'antigua UNA.

Nun se si l'autor d'esti articulo ta al dia de la politica asturiana, nin se si tien rellacion con los partios IU-BA, UNA, Andecha, PAS, URAS, pa saber cualas son las sos posturas.
Las sos pallabras son ulusionantes pero son esu ilusion ya suaños.
La politica asturiana nos ultimos 30 años como bien dixo el de California resumese en egoismos, peleas, disputas, egocentrismo, errores, independentismu al altu la lleva, torpezas politicas ya folgazanes babayus.
Güei en dia la xuntanza con Andecha quitando los cartelos a UNA ya mintiendo en cada articulu de infoasturies ye una absoluta estupidez. 
Nun se si tan bromeandu ciertos blogues de xuntanza pero mientras tean Arbesu ya MAF nesi partiu con unas siglas que nun-ys pertenecen d'esa xente solu hai pedi-ys que nun molesten nin quiten los cartelos a los demas partios.
La xuntanza con UNA, teniendu en cuenta que tovia nun tan representaus ni en 5 conceyus outra absoluta estupidez, del Bloque por Asturias creo que las sos politicas llinguisticas ya mediu ambientales falan solas pa xuntase con UNA.
El URAS casi nun esiste, PAS lo mesmu ademas son de centro derechona.
 
Suañar ta bien, fainos despegar de la cruda realidá, pero pa fader politica hai que tar na realidá.
Dientro de 20 años esti articulu quiciabes tenga sentiu.

Andolinos, nun se si lleiste llínia por llínia l’artículu o ye que nun m’esplico a la hora d’escribir, daqué que me preocuparía ya qu’otra xente si qu’entendió les mios intenciones. 
 
L’autor d’esti artículu ta al día de la política asturiana dende qu’entamó d’adolescente a militar políticamente. Nun tuve relación col PAS y col URAS, sigles a les que nun faigo referencia en nengún momentu nel artículu porque ésti ta escrito dende l’ámbitu políticu de la izquierda, espaciu nel que yo me llevo moviendo dellos años.
 
Sí mantuve relaciones compartiendo espacios y nalgunos casos militancia con sigles de partíos como UNA, Andecha, BA, PCPE; candidatures como Iniciativa Internacionalista ya Izquierda Anticapitalista; organizaciones de mocedá como Darréu, Fai!, CMC o UNA-Mocedá; sindicatos como la Corriente Sindical d’Izquierda y movimientos sociales de toa triba que van dende l’antiracismu hasta la solidaridá internacionalista pasando pol movimimientu antirrepresivu o la okupación.
 
Soi perfeutamente consciente de los roces, los egoísmos, les disputes, l’egocentrismu, les pelees… viví a lo llargu d’estos cinco años de militancia dellos procesos que provocaron ruptures, frustración y enemistaes con mui difícil igua.
 
Ye por eso qu’en base a lo que viví y observo de la realidá fago esti artículu, onde te vuelvo a repetir a tí lo que n’él espuse.
 
Creo qu’hai toa una serie de movimientos políticos, sociales y persones individuales que compartimos unos mínimos ideolóxicos y espacios na defensa d’esos mínimos.
 
Pero tamién opino - a la escontra de munchos ciberalderiques que falen d’una irreal y obsesiva xuntanza del nacionalismu d’izquierda - que por toos esos roces, esi apreciu a unes sigles que representen una estratexa y años de trabayu y demás factores ye irreal dafechu proponer que toes eses sigles s’agrupen nuna única organización política.
 
Ye por eso qu’en base al matu que mos vien enriba d’equí a dos años y planteando alternatives en clave eleutoral; propongo nel artículu l’impulsar eses hipotétiques candidatures d’unidá popular en base a los citaos mínimos ideolóxicos comunes, nes que converxan diferentes persones d’eses sigles polítiques, movimientos sociales y xente individual y que nun implique la desaparición de ca una de les organizaciones.
 
Espero qu’agora desplicáu por segunda vegada entiendas el mi planteamientu.
 
Esti artículu escribilu col enfotu de crear una reflexón y un alderique participativu nel senu de la izquierda alternativa asturiana, col oxetivu qu’haya un procesu común eficaz y realista. Lo mio ye una propuesta, pero nun ye la Biblia, lo que naguao por fomentar ye un alderique ente diferentes sensibilidaes d’esti ámbitu políticu p’articular rempuestes y estratexies efectives.
 
Cierto ye qu’hai munchos roces y munches enemistaes nestos ámbitos políticos, que se comentieron abondes descalificaciones, errores y escesos. Pero enxamás ye tarde pa camudar d’estratexa y reaccionar a tiempu, pa nun repetir errores del pasáu y mirar al futuru d’una nueva manera.
 
Matizo tamién qu’esti artículu quiciabes ye demasiáu eleutoralista y esi tampoco ye’l mi fin. Poco se va algamar si se sumen sigles solo por sumar. Detrás hai que desendolcar un trabayu diariu de base, de conectar cola xente, de tener presencia mediática, d’adaptar el tonu de les reivindicaciones a la realidá social…; eses son dalgunes de les claves que yo creo que mos puen ayudar a salir del guetu. Si nesti camín se ve qu’el trabayu a comuña foi llevaderu, que mos podemos entender y qu’el nuesu mensaxe caló na sociedá entos ya sí, entos si se viera viable sedría’l momentu de converxer neses candidatures populares. Pero esto como pasu final. Primero’l trabayu de base.
 
 
Pa finar dicir qu’esti artículu ta en clave constructiva. Ya valió de frustración, de tiranos piedres, de postures negatives, de que les feríes sigan mancando… esi tiempu tien de pasar.
 
Comentarios como’l que tu escribes equí – y munchos otros qu’apaecen pela rede dende la “valentía” del anonimatu – poco ayuden a que surdan nueves esperances polítiques que xeneren ilusión, qu’aglutinen a nuevos sectores desencantaos de la izquierda, que faigan volver al trabayu a xente como Xilón (gracies pola to valoración) y otros munchos que quedaron pel camín.
 
Reafírmome nos dos caberos párrafos del artículu. Ye hora de construir y dexar atrás los cabezazos escontra la parede:
 
“Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.
 
Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.”
 
Un saludu

Nestu toi contigu.
 
"Matizo tamién qu’esti artículu quiciabes ye demasiáu eleutoralista y esi tampoco ye’l mi fin. Poco se va algamar si se sumen sigles solo por sumar. Detrás hai que desendolcar un trabayu diariu de base, de conectar cola xente, de tener presencia mediática, d’adaptar el tonu de les reivindicaciones a la realidá social…; eses son dalgunes de les claves que yo creo que mos puen ayudar a salir del guetu. Si nesti camín se ve qu’el trabayu a comuña foi llevaderu, que mos podemos entender y qu’el nuesu mensaxe caló na sociedá entos ya sí, entos si se viera viable sedría’l momentu de converxer neses candidatures populares. Pero esto como pasu final. Primero’l trabayu de base."
 
Peru nun caigas nel error de intentar xuntar a xente que nunca enxamas vei axuntase.
Tu ya xente moza cumu tu sois el futuru, mirai p'alantre.
 
Un saludu

Con tolos respetos, esti artículu, ta nes antípodes más australes y a años lluz de la realidá social y política de la sociedá asturiana. Ye un artículu más p'"autoconsumu" de los pocos convencíos que nun se ponen d'alcuerdu nin sobre unos mínimos pal "nacionalismu asturianu d'izquierdes" (lo más minoritario de lo más minoritario) y que se lleven a matar, que pa la xente que potencialmente podía allegase a algo asturiano que tanta falta fai. A día d'hoi dígovos, y quixera enquivocame, que viendo estes coses nun puedo más qu'augurar una nueva debacle electoral nes próximes autonómiques. Siéntolo pero yo piénsolo asina.

Gabis

 toi fartu d' esta xente que anda siempres glayando y berrando peles orielles.
SI de verdá lo ves tan prieto, si nun te peta trabayar, si nun ties mas ganes de facer un res... pues a colar pa casina y a ver elli la TPA tranquilin, pero nun andar siempre cola mesma cantinela de "vaya mierda tou.. nos vamos espetar... etc etc.
QUe se queden los que tean ganes, ilusion y fuercies... aunque seyan pocos.. vale más que trabayar con xente que ta falando babayeaes. Desaniciando a la xente....
 
YES UN INFILTRAU DEL GOCHU FARTON!!!

Veo lo receptivu que ye l'asturianismu a les crítiques. Pues fíu, insultando nun vas faceme callar, si depués de 33 años mires onde tamos paezme que nestos ámbitos internos alguna crítica habrá que facer. Yo nun digo que nun haya xente que faiga gran trabayu y tenga bonables intenciones, digo que daqué pasa si eso nun cuaya. Agora, si una discrepancia estratéxica hailu que la toma como un ataque personal y que los que nun decimos "amen" somos "infiltraos", pues mui guapo, nun m'estraña ver los sapazos y topetazos, escisiones y males querencies que caractericen al cada vez más atomizáu y minoritariu nacionalismu asturianu. Si hailos que pensais que vais pel camín correchu y qu'estos análisis son la de coyer, paezme mui bien, pero yo nun soi d'esa opinión´.

Gabis

Nun se, pero ta claro qu'esti nun ye un articulu d'opinión mas sobre la xuntanza y toes eses palabres grandones que muncha xente cree que son la panacea. Ye falando'n plata una reflexón qu'afalaga a la refelxón y fai un analís real de como ta'l percal.
Ye una rempuesta a esos llamaos a la xuntanza pola xuntanza que fai muncha xente al altu la lleba. Pero qué ye que nun se da cuenta esa xente que (dende'l puntu de vista elleutoral) cero mas cero sumen cero?? Por eso que fala del trabayu, de salir del ghettu. Eso ye lo principal, salir del ghettu, y pa eso hai que currar politica municipal, politica de barriu, politica maediambiental, pero de verdá, nel dia a dia, nun val con colgar la chapa na solapa. Y d'eso... por desgracia nel nacionaismu d'izquierdes asturianu hai bien poco (nun quiero dicir que nun lo haiga). El trabayu diariu y el bombardiar la prensa con tolos trabayos desarrollaos y el tar cerca la xente ye lo que fai que nun seyas un marcianu ye la forma d'esparder la to forma de ver les coses ensin asutar a naide. Y d'eso hai buenos exemplos. Eso ye sumar, eso ye axuntar.
Pa mi que Xicu tamién dexa claro que tá falando de ambitu de la izquerda nacionaliega o asturiana.  Eso pa la xente que pensamos o mos articulamos dientro del ampliu aspectru de la izquierda cai de caxón. Pa mi la llingua nun ye l'acabose, nin la cultura asturiana, nin la nuesa tierra. Pa mi eso son drechos basicos y fundamentales, ye'l mi dia a dia. Pa mi o pa un apersona d'izquerdes la llucha ye mas amplia y too ésto bien nel paquete con munches mas coses. Los asturianistes a seques que se xunten colos asturianistes a seques, colos que nun-yos importen los drechos civilies, nin los drechos llaborales, nin la esistencia d'una sanidá publica EN CONDICIONES, nin la llucha escontra la esplotación llaboral, nin la defensa de la igualdá de drechos, nin la llucha escontra un sistema capitalista que da calor y comida a unos a base de la muerte y la fame d'otros, nin...
Y creo que'a estes altures de la pelicula hai muncha xente que sabe quien ye Xicu Ariza. posiblemente anguañu nun tea militando en nengún partiu politucu, pero si ye un activista de los de verdá, non de los de la chapa. Ye un activista que se lleba mobiendose y dinamizando tolo que-y dexa la so mozedá dientro de munchos aspectros de les lluches sociales. Y que yo sepa, n'esos años la onestidá nun-y faltó. Como él son o somos munchos (nun se si puedo considerame) los que nun militen o miltamos en nengún partiu asturianu d'izquierdes que nun tamos colos brazos cruzaos y son o somos activistes en munchos colectivos o de forma individual, y siguirá siendo asina, salgan los resultaos electorales que salgan. Ye una pena nun tener un frente onde converxer, un frente nel que como diz Xicu, naide entierre nin les sos siegles nin la so individualidá, pero dende'l que poder articular rempuestes a toles agrasiones que como ciudadanos asturianos y del mundu tamos sufriendo. Como diz nel articulu nun ye solo sumar siegles, ye faer trabayu real.
Simpre me h.odió la xente que-y diz a los demas como tien que faer les coses. Nun quisiera n'esta reflexón caer nesi sacu que yo fixe, simplemente considerolo una aucritica constructiba de lo que se ta falando.
 
Delfín Valdes Alvarez. (delfo)
 
 

Delfín, la nobleza les tos palabres ta a años lluz de la realidá asturiana, como la del mocín esti qu'escribe tan guapos artículos, que de xuro y nun niego que dan una grande satisfacción personal y familiar, pero eso nun va a nengún llugar . Si queremos lliteratura d'evasión preferimos a Caperuchina Roxa, El Magu d'Oz, El Baille(sic) de Los Vampiros, y tola prestosa lliteratura d'evasión que pertenéz al ricu patrimoniu de la Humanidá. Munches Gracies, pero pa falame d'Alice in Wonderland yá esisten otros autores, non superaos, de momentu.

Gabis

Contador Estadistiques