*************************************************************

D. José Aniceto González:

"’N el portal de Belén”


FONTE:

"Los nuevos bablistas" (1925)
(Enrique García Rendueles)


Respétase la grafía orixinal.

***********************************************************************



'N EL PORTAL DE BELÉN

E nun portalín per probe, 
Malapenes con abrigu, 
Un Neñu duerme tranquilu 
De sos padres al empar. 
Un Neñu tan llistu y guapu; 
Tan xentil, tan gayasperu 
Que non hay ' n el mundu ' nteru 
Quien lu pueda semeyar. 
Ye so carina de gloria, 
Y tien so voz tal dolzura, 
Q' hasta en la mesma espesura 
Empapiella el paxarín.
Son de nácar sos mexelles 
Y al rise, dos furaquinos 
Llucen enos sos papinos, 
Cual dos roses ' n el xardín. 
¿ Y quién será aquesi Neñu 
Que al miralu ensolamente, 
Paez utru ya 'l ambiente 
Q' arrodiase nuestru sér;
Y de güeyinos tan monos….
Y de carina tan bella...
Que ya ví más d' una estrella
Fuxir so hermosura al ver ?
El Dios inmortal y eternu
Que baxás de les altures,
A 'endolzar les amargures
Que saborgaben sos fíos,
De los homes que trocando
Po la culpa la inociencia,
Dispreciaron so querencia
Por completo atochecíos.
El Fíu ye de la Virxen,  
Clara estrella, lluz del alma,  
Que dá la fuxida calma
Al que de veres lu quier;
Y que por salvar al home 
Que xime' n aquesti suelu, 
Y abrir les puertes del cielu ... 
¡ ´N una cruz ha de morrer ! 
El que de la nada fexo 
Cuanto 'n altura miramos, 
Y ena tierra contemplamos 
Desque´ l alba va á riscar. 
Y viste de fueyes l' árbol, 
Y los campos de florines, 
Y de glories pelegrines 
La tierra, el cielu y el mar.
Anxelín del alma mía, 
Consuelu de mió tristeza, 
Qué exemplu dás probeza 
Siendo del mundo Siñor; 
A la vera de to cuna
 Me postro 'n aquesti día, 
Y un ¡ ijujú ! d' alegría 
Mió pechu llancia en t' honor.