************************************************************* Pepín de Pría. "Obres Completes" (Poesía) FONTE: "Fuxeren los ardienes". Edición y estudiu preliminar de Miguel Ramos Corrada. Respétase la grafía orixinal. ********************************************************************** Fuxeren los ardientes calores del veranu, del álamu les fueyes están marielles ya, les mayances tán llimpies y recoyíu´l granu y la fruta del tiempu pa recoyer está. De la pomposa viña guardaos entre fueyes hinchaos los recimos empiecen coloriar: les uves de les negres colorien en vermeyes, les blanques ya escomiencen también a rellumbar. S´acerquen les coyides: de todos los llagares ya dicen los péritos que ya tán en sazón. Prepárense los cuébanos, llímpiense los llagares y axústense los mozos que lleguen en montón. Qu´al suelu castillanu pa la vendimia y siega en bandaes tremendes, buscando un bon xornal, d´Asturies y Galicia la flor de mozos llega dexando sos montañes, sos huertos de frutal. El ruidu y movimientu, la xente folastera se allarga per doquier; y en tantu que los díes que so trabayu espera rebúscalos de afanes en hores de placer. ¡ Que tiempu más alegre ! non hebo hora más grata al corazón sencillu del francu llabrador: ni oyeren siñorones tan tienra serenata como´l lexanu acentu del bon vendimiador.