************************************************************* D. Enrique García-Rendueles: “El báilale oso” FONTE: "Los nuevos bablistas" (1925) (Enrique García Rendueles) Respétase la grafía orixinal. *********************************************************************** EL BAILALE OSO Al báilale oso, Al son del panderu Fáise lluego 'l corru, Xúntense los neños; El húngaru errante Da nel parche secu Y el son ye monótonu, Non ye aguilanderu, Ye doliente y sordu Como el del disiertu. Llevanta les manes El osu severu, Da una güelta y otra, Y apárase enmediu; El amu averdáscai Y fácese 'l muertu, Apenes gurguta, Non tien ensaliendu; Y lluego llevántase Gárrase col dueñu; Repite les güeltes Llevando 'l panderu, Saca tres ablanes, Dos figos, un piescu; Y siguen la andancia Per utru senderu. El osu camina, Y camina 'l dueñu. ¡ Canta vagamundu El to sentimentu ! Y pasen les sebes, Y crucien el puertu, Canta vagamundu, Canta en sin aliendu, Y ¡ hala ! pa delante, ¡ Non perdáis el fuelgu ! El sol non alluma Lo que manda é fuebu; Ardidu ta l' aire, Perardíu el suelu. El osu camina Y camina 'l dueñu; Aquel muertu fame, De sede isti muertu; ¡ Y, hala, pa delante Col to sofrimientu ! Finaba la senda, Y tendíos en suelu Un morrió de fame, Utru d´andariegu.