Los llibros de l'alcordanza

Pasín ente pasu, cuasi ensin pescancialo, la Lliteratura Infantil Asturiana va cumplir la so mayoría d’edá. Los 18 años. Fue allá pel añu 1982 cuando l’Academia de la Llingua Asturiana decide, a la vista la non esistencia de llibros pa neños y rapazos, crear un premiu infantil cola idega puesta en dir faciendo una coleición pal día en que l’asturianu entrara dafechu nes escueles. Unos materiales afayadizos pa poder trabayar con esos neños que diben ser el futuru de la llingua. Recordemos que la principal reivindicación d’aquella manifestación del añu 1976 en Xixón, la primera n’Asturies de la llamada Transición, yera "Bable nes escueles". Seis años dempués, ñaz el premiu Llectures pa Rapacinos y la Coleición Escolín

D’entós p’acá yá llovió muncho. Llovió, xarazó y ñevó, y tamién hebo dalguna qu’otra truena. Pero, fuera como fuere, equí tamos. Los tiempos camudaron (quiciás non tanto), y d’aquellos primeros enfotos de calter "pedagoxista", pasóse a una llibertá total a la hora de plantease’l escribir pa neños y rapazos. Agora, yá nel añu 2001, la nómina d’autores enanchóse, y la temática y el tratamientu del llibru infantil adautáronse a los nuevos tiempos.

Ensin embargu, queden na memoria un garrapiellu llibros y d’autores que ye de xusticia valorar. Munchos d’ellos yá "agotaos" (tanto los llibros como los autores), y otros qu’entá siguen trabayando nésta y n’otres estayes relacionaes cola llingua o la lliteratura. Porque camentamos que ye bono mirar pal pasáu pa nun escaecer d’ú venimos, y porque les nueves xeneraciones tienen drechu a conocer esi pasáu pa tener más ñidio a ú van, ye polo que ñaz esti espaciu de "Los llibros de l’alcordanza", pa rescatar del olvidu coses valoratibles y actualizar esi "ordenador. Com" que ye la memoria.

MIGUEL SOLÍS SANTOS ye un d’esos autores imprescindibles. Avilesín, profesor, dibuxante, foi ún de los más abondosos escritores del Renacimientu lliterariu asturianu. Ganador de numerosos premios, llució con lluz propia nes narraciones pa neños y rapazos. Espublizó llibros de mitoloxía (Les Xanes, El Cuélebre), una Hestoria d’Avilés en formatu cómic, etc. Pero foi col so personaxe de Ñuberu col que ganó una merecida fama. A lo llargo de cinco años, de 1982 a 1987, espublizó na Coleición Escolín otros tantos llibros cuyos títulos foron:

L’arcu Iris y Ñuberu, Les cuatro estaciones y Ñuberu, Los cazadores, los llobos y el Ñuberu, Los árboles, l’ocalitu y Ñuberu, Ñuberu y la paz Ilustraos con unos perguapos dibuxos d’él mesmu, estes histories nes qu’un Ñuberu bonacible y amistosu, intervién nos asuntos humanos pa enseñar al que nun sabe, o enderechar los munchos enguedeyos en que la xente suel metese por maldá o inorancia foron mui cellebraos polos escolinos d’entós.

Los dos primeros títulos son de calter más descriptivu, los colores, les estaciones... pero yá nos tres caberos, Solís toma partíu dafechu por temes agora mui de moda, como l’ecoloxismu, o’l pacifismu. Pero con un tratamientu non panfletariu, sinón esforciándose por comencer. A los cazadores coméncelos de que, en llugar de disparar perdigones, ye muncho más guapo disparar semiente de flores, y asina sálen-yos pelos cañones de les escopetes ramos de precioses flores. L’ocalitu, dase cuenta del mal que ta faciendo nel monte:

_¿Y cómo tas tan triste? _ Porque sé qu’esfelpeyo’l suelu y les otres plantes nun puen espoxigar n’él Amás siéntese estranxeru, al llau de tolos otros árboles d’equí, y quier tornar al so país, Australia. Asina que, xúntese toos, y aídenlu a embarcar pa la so tierra d’orixen, ente l’alborotu de tola viesca.

Nel últimu llibru de la serie ye onde Solís Santos s’amuesa más críticu. Con un llinguax mui cenciellu, y unos dibuxos enllenos d’encantu, ye capaz d’enseñanos la crueldá de la guerra, desmitificándola y comenciéndonos (al tiempu qu’a los soldaos) de lo absurda que ye:

_¿Qué facéis tan lloñe de la vuesa casa?

_Ye que nos mandaron a escontra aquella xente del otru llau d’esti campu

Entós Ñuberu preguntó-yos: _ Qué vos fexeron? A lo qu’un soldáu respondió-y _¡Nada!. Pero obligáronnos venir equí. ¡Tenemos llercia abondo!. ¡Prúyenos que nos dexen en paz como siempre vivimos!

Al final los soldaos dambos llaos pónense d’alcuerdu y terminen escorriendo a los xenerales y tirándo-yos con cervatanes.

Nun taría de más que, por parte de les autoridaes de l’Academia, volviesen a reeditase los llibros de Solís Santos, casu que tuvieren agotaos. Y si non ye asina, recomiéndovos a toos, grandes y pequeños, que vos faigais con ellos. De xuru vais esfrutar como yo lo fice

Vicente García Oliva