XUANÍN DE MIERES

 

Canta Xuanín, y callen los xilgueros,

les calandries, los mirlos, los pinzones,

los malvises, los tordos, los gurriones

y les críes qu’esplumen pelos ñeros...

 

Canta Xuanín, y callen los regueros,

y non mermura l’aire sos pregones,

y non toquen al rezu d’oraciones,

per oyelu cantar, los campaneros.

 

Él ye la voz del agua de les fontes,

y ye la voz del árbol pelos montes,

y ye la voz del mar, bravíu o en calma...

 

Canta Xuanín, y la tierrina entera

ye música en so voz recia y melguera,

dexando en plasmu’l corazón y l’alma.

 

                             (de Xente de casa)