VICIOS NUNA CIUDADE ABIERTA
 
La ciudade extiéndese en vertical. 
Una llanza que ruempe'l cielu 
ya acaba por ferir el tou corazón. 
Neste sacrificiu 
prevalez la llei del sangre, 
una voz chena de firmeza ya amargor 
qu'entre todas, espera. Tovía. 
Pérdese débil na entraña de la nueite. 
Acude col ímpetu d'un ríu 
a la chamada de la muerte 
mentres la ciudade, implacable, 
se funde ya s'alimenta d'extraños suicidios, 
comentaos el día espuéis 
nas páxinas grises de los diarios. 
Un home anónimu 
-¿comu puede un home ser anónimu?- 
mide col cuerpu inerte 
los ángulos d'un patiu interior. 
Fórmase alredor un círculu d'aliendos 
qu'empieza a viciar l'aire escasu: 
"al animal siempres lu deguye la lloucura"
ya cai abaxu, comu si nada aconteciera, 
circulan dica la próxima estación, 
dica'l próximu suicidiu.