************************************************************* Marcos del Torniello D. José Benigno García: "Tenreces amorosines" FONTE: "Los nuevos bablistas" (1925) (Enrique García Rendueles) Respétase la grafía orixinal. *********************************************************************** TENRECES AMOROSINES « Non pongas escarapela, Mira que me das la muerte; Abonda pena me diste Cuando te tocó la suerte. » Así cantaba na llosa Pepa de Xuan de Vicente, Tan y mientes que tendía, Nos escayos de la sebe, La ropa de la colada, Blanca como ye la lleche. Tá vertiendo cuando canta Llarimines como pelres, Que-i abaxen silencioses N s papinos per-u cuerren, Pa dir esbária qu' esbária Nel ricu sen á escondese, Porqu' el sen ye un abriguero Y, al abrigo, más que xele. ¿ Qué por qué llora Pepina ? Porque tién abondes penes Que-i arranquen les entrañes, Y tá el corazón que-i fiende. Y' el rapaz por quian sospira, Que la quier como se debe Pa casase, si la Virgen Yos ayuda nes querencíes, Por quian tá Pepa sin sombra, Sin saber qué-i asocede. Ye quinto el probe Colás; Non tien desención, nin perres, Nin más remedio que dir Caminín de Uviedo el xueves, Pa filiase de recluta Del servicio permanente, Nel cuartel de Santa Clara, Casarón qu' el moco i fiede… Porque mialma que se fila Delgaduco nos cuarteles. Colasín ta muncho triste. Fáis' empero que tá alegre Pa non dái penes á Pepa, Pa non dái á Pepa penes, Pa que todos nel conceyo Digan d' él que ye valiente, Que nin tién miedo á la guerra, Que les bales non les teme, Y que va servir al Rey Porque quier facese célebre. Así ye que na quintana, Na pación, é nes caleyes, Tá Colás col ijujú Na garganta munches veces, Canta que te cantarás: < Pepa, non te desconsueles, Que me tó casar contigo Cuando cumpla y me licencien. > Óilo Pepina y suspira Como quian les penes texe, Remellando los güeyinos Pa una trenza rosa y verde Que trái fecha una llazada Na montera, muncho terne, Colasín, porque se fale De la xixa qu' él escuende. Tán mirando el ún pal utro, Sin falar porqu' empapiellen……. Por de postre y despedida Tres besinos é na frente Dánse, y marcha Colasin Por camberos y veredes Chando el ijujú, y cantando, Como canten nes andeches: < Non te desconsueles, Pepa, Pepa, non te desconsueles, Que me tó casar contigo Cuando cumpla y me licencien. » Y por non ser menos ella, Tamién canta muncho sele: < Non pongas escarapela, Mira que me dás la muerte; Abonda pena me diste Cuando te tocó la suerte. >