*****************************************************************************

Títulu: El solar de Don Pelayo o el romance de los cuatro morangos

Autor: Matías Conde (1896-1982)

Fonte:

*****************************************************************************


Dos guardies ceviles vienen
¡ai madre! pela caleya.
Dos guardies ceviles ¡madre!
s´acerquen a la portiella.
Tricornios de los ceviles,
negros tricornios, más negros
que la cara de los moros
que vinieron de tan lexos
a manchanos esti suelu
qu´enxamás pisaron “perros”.
¡Mala la hobiesteis! ¡villanos!
¡Mala, quien va defendevos!
Tricornios de los ceviles,
tricornios negros, mui negros
¡Cómo antes ereis la paz!
¡Cómo, hoi,  sólo traeis duelos!
¡Altu, los guardies ceviles!
¡Non páséis de la portiella!
¡Altu!,l dixe ¿qué tréis?
¿Traeis la paz o la guerra?
El mio home non ta en casa.
Ye lo mesmo que toviera
que non habréis de pasar
enxamás d´esa trabiella.
Esta casa ye sagrá,
y naide s´arrime a ella.
Manque soi muyer, me basto
yo sola, pa defendela.

Cuatro morangos vinieron,
los cuatro en son de pendencia;
y los cuatro tán tiraos
en metá de la caleya.
Y no hue´l mio home, non.
Con esta mesma escopeta,
matélos yo, ¿non lo oís?.
Yo los maté. Sí. ¡Yo mesma!.
Agora yá lo sabéis.
Mas enxamás saldré presa.
Sois pocu dos,  pa llevame;
pos habrán llevarme muerta.
Cuatro morangos vinieron,
los cuatro en son de pelea.
Pa ultraxame son mui pocos
asín que yo vida tenga.
Qu´esta casa ye sagrá
y non han de poner en ella
les plantes perros xudios
qu´habríen d´escarnecela.
Con que yá sabéis, ceviles,
lo que´l préndeme vos cuesta:
¡Ai, si dais un pasu más!
¡Ah, si tocáis la portiella!
¡Si facéis un degomán,
hoy dormís ena caleya!