*************************************************************

D. José Manuel García González (Marcos del Torniello):

"Gozoniega"


FONTE:

"Lliteratura asturiana nel tiempu" (1994)
(Antón García)

***************************************************************

Soi de Verdiciu
nací a la vera
del Cabo de Peñas,
xunta la mar;
non hai tocimus
na mio panera,
pero hai gabitus
au los colgar.

Dispiertu al riscar el alba,
tiro un blinco del xergón;
y  voi a coyer les berces
pa char con fabes y con llacón.
Si una vez, o dos, o tres,
baxo  a la villa al mercáu,
todos me miren  de llau
y dicen “Neña, ¡qué guapa yes!”

Tengo un mozacu
que me corteya
y que me plizca
si-y fau rabiar,
que, al veme, berra 
como una oveya.
porque  conmigu
se quier casar.

El diz que de molineru
gana todu cuantu quier
y que si non ye primeru
seré, en Xineru, la so muyer.
Si una vez, o dos, o tres,
baxo  a la villa al mercáu,
todos me miren de llau
y dicen “Neña, ¡que guapa yes!”