************************************************************* D. Teodoro Cuesta La banda de música del Hospicio. AGUINALDO Romance Llambión. FONTE: "Dellos poemes más" (1995) (Academia de la Llingua Asturiana) Respétase la grafía orixinal. *********************************************************************** Un añu xustu y cabal (que nos rindió por milenta) fai, siñor, que d' AGUILANDU axuntamos mas moneda, que coquinos tien un quesu de Cabrales, fechu repla, ó que sospirinos lláncia, al vése por vez primera, rapaza, que les vexigues trocaron de guapa 'n fea. Entóncenes como agora, sin paraxismu nin muezca, diónos la blanca propina, que ye meyor que la prieta. Nosotros agradecios, com` hoy, una papeleta i dexamos imprentáa co la historia verdadera de Xirómon el Torollu, que co 'l gadañu una deda llevóse, ´stando segando alcacer pa la noviella. Mas si un cuentu `l utru añu i dimos d` amor en prenda, en isti, pa non ser menos, sacamos de la raollera una charáa, como dicen en Uvieo, que'n aldéa á la cosa revesosa llamamos-i casa-diella. Non tendrá q' escurrir muncho, nin ye menester gran cencia p` acertála, pos al prontu desañudola Coniella. El todu ¿pa qué negalo ? ye cosa que nos revienta, y lo fai, sin remediallo, la xente paraxismera. Mas val sin pizca del todu llamános, y con franqueza decinos, como nos dixo unu que vive aquí cerca: << des que 'l dia amaneció que traxo la Noche-güena, non hubo perru nin gatu q' aguilandu non pidiera: y po lo tanto, teniendo sin blanca la faltriquera, co la música a otra parte el viaxe 'ntamai apriesa.>>, Eso al todu escoyeremos; pos y´ enoxóso 'n concencia oyer decir....-Rapacin, los amos tan en 'a iglesia: vólvi mañana trempano. -Mañana non dan llicencia. -Pos mialmina, como ves, soy una probe sirvienta y faigo lo que me manden... . Al sonar tanta trompeta, el siñor, que remoyando tien los piés en una duerna pa cortar dimpues un callu, que i salió 'nriba una deda, díxome; «diyos á esos q' estamos en misa... y pieslla.>> Pero basta d' aleluyes, que ya sobren en concencia, y escomience 'l acertixu ó como llamase deba. Pregonóse Gorin con Rifaela, en el dichu enfotáu que so güela, cuando 'l güeyu cierrara, i dexaria bienes, vaques, preséos y cacía. Como pizca non tien de tontu 'l mozu llenólu la promesa d' alborozu al ver que la güelina ye tan vieya que tres pelos non tien en cáa ceya. Por eso de calzones y montera, que trocó con un xastre per cevera, á ver la novia va mas altaneru que quien tenga cien goxos de dineru. Mirando con sobervia a tóos llaós y ruxiendo diez cuartos emprestáos, á la casa llegó de la rapaza la que puesta á comer,diz que taraza. Quedó de piquiñina sin primera, pos la prima y segunda en 'a cantera i desfixo una llábana, y de pena entroi, ye natural, la cangarena. Como neña mas chusca´n el conceyu non nació de muyer,el mozu, ´l vieyu, el probe ó´l ranegueru non se farta de mirar al miralla tercia y cuarta. Munchos de prima y cuarta,la quintana, alloriáos por moza tan galana, entamen á so puerta agarradielles llevando bien mayaes les costielles. Mas por muncho que lluevan guiadáes, tellerónes, sopapos y mocáes, en ´a segunda y cuarta, cual so güela, sentadina se queda Rifaela. Solu 'l amu Gorin ye de la neña, al que á fégados, puños y redeña non nació quien delantre se i punxera pos bastia sin trabayu la tercera. Dexaremos falando del casoriu á la nieta, la güela y á Gregoriu... - ¿ Casaránse por fin ? ¿Non lo sabremos? - Al utru San Manuel vos lo diremos.