*************************************************************

D. Fabriciano González García (Fabricio):

"El Ferreru"


FONTE:

"Lliteratura asturiana nel tiempu" (1994)
(Antón García)

***************************************************************

Chutón! Que fala Güelina...

- Pos siñor, una vez yera un rei ná empariotáu, sin pizca de paxariegu y que s´esmolia abondo pol bon gobiernu de los sos. Y con eso, frente por frente del so palacio, antoxana  pel medio, moraba un ferreru de tan bona xera y afadiu al trabayu, que lloñe d´enfurruñase pasaba´l santu día desgañitándose en cantar al altu la lleva y al sonsón de sos preseos. Delles veces, al frañir el fierro y quiciáes quiciáes pa escorrexar la gazuza acompasaba´l martiellu: ¡A merendar! ¡ a merendar ! ¡ a merendar !... Dimpués  xirimiquiaba col yuncle ¡n´hai qué! ¡n´hai que! ¡n´hai que!... Y lluigo ensín dar queda,  xiretando del fuelle, reburdiaba ¡A pufu! ¡a pufu!

Gusmiólu´l  Rei  y aguixáu pel rixu del saber,  curiólu un día y encariolu:

- Bonos días, güen Ferreru - apenzo´l Rei.

- Santos y bonos los depare Dios a vostra Maxestá- asecundo´l Ferreru, llevantando la cachucha.

- Vamos, home, y ¿cuánto trabayes y ganes que tan contintu t´afayes  sin cierra´l picu nuiche nin día pa maravayu de la quintana?

- Siñor, trabayo ensín esmanganiame d´estrella a estrella pa ganar al rau de cien maravedises y los choyos que dacuando pinten.

- Y ¿enfoniles muncho colos choyos?

- Como enfonilar, non siñor, porque allegues de ralo en ralo ¡pero haber hailos d´a blanca columaria y fasta d´a ducáu que faen espirriar y dar la vida.

- Y ¿ qué milagros faes con esos monises? - entrugó-y el Rei.

- Por Siñor, con ellos - dixo ´l Ferreru - mantengo, visto y calzo a mio madre, la muyer y siete fíos, pago reutos atrasiaos y axunto pa la veyez.

- Desentrúllame  aina esa xirigoncia - encamentó´l Rei pertrastavíau. 

- Con munchu gusto y fina voluntá, siñor, que non ye denguna enxaramiella. Todos yantamos y empaxellamos fasta donde´l texe algama: pero al cudiar de mio madre pago reutos artrasiaos y al criar los fiyos axunto pa la veyez, al enfotu de que  m´amparen cuando encarníe y averguniáu y enxencle hebia que sacame nun paxu al sol.

- Razón con derechu - apuslló´l Rei, que sintía rebelgos col calter agudu del Ferreru; y encañudo: - cuando me dixistí non lo cuntarás a naide sin que te pese, mentanto no vegas la mio cara milenta veces. ¿Atendisti? - y con esto empobinó´l Rei. Dexando al Ferreru trastayáu y cola pallabra en boca.

Y con eso, allugóse al Palacio y ensín tomar fuilgu,  llamó los ministros al Conseyu y entrugo-yos.

- ¿Cómo podrá un home con cien maravedises mantener diez boques, pagar reutos vencíos y axuntar pa la veyez.

Quedándose empaparotáos tos los menistros como paniflotos que s´ambabayen sin apusllar palabra; y al vellos tan rudos y tapinos encamentó-yos el Rei;

-Si d´aquí a tres dís non me desentrulliáis y esquillonáis la cosa, despedívos de la rucaera.

Entoncía yera de vellos, char cuentes y chuchotiase, pero por más que se desgüeyaben enriba de los llibros y estruíen  el callatre y el maxín ca vez s´atrapecien más sin atar cou nin dar per illi col xunviellu;  y ansí andaben amusgaos y muertos de llercia y el más apilpayáu el mandón d´illos, que xuno semeyaba a glayu acagarraciáU cola pervida.

El Ferreru que lU gusmió fexose l´encontradizu y aprovechando les ofiertes del mandón de los menistros, pidió-y  milenta duros pol secretu. Allargó-ylos el mandón nin mancu nin perezosu y el Ferreru encorexólos cuntando-y ce por be los inquices de la cosa.

Magar el Rei oyó  la explicative del Mandón, picóse y non del foroñu y más enchipáu qu´un pavu infló les ñarices y mandó llamar al Ferreru.

Allugose isti y al reborvogallu´l Rei por desobedencia y por chorlitu y llinguateru que faló sin ver so cara milenta veces, apenzó'l Ferreru a tirar los duros enriba la mesa y entrugó:

- Ah Siñor ¿ñegará vostra Maxistá so cara?

Apechugó´l Rei y dixo:

- ¡Pintiparao! Dende ogaño en adellantre serás tú'l Mandón de los menistros por agudu y por arteru, pondrás paxellu de tricornio y casaca en vez de cachucha y cerigüelles y rispirás pela min facienda codiando la corexa de les amarielles.

Y colorín colorao, el mio cuentu está acabao.