***************************************************************************** Títulu: Xacinto Cantarines Autor: Emilio Robles Muñiz (Pachín de Melás) Fonte: ***************************************************************************** Yera Xacinto un mozu altu, delgáu, flacu, correúdu con más huesu que freba y más pates que barriga, dalgo allombáu; y al tentu de los deos podíen cuntase les banielles del renaz, pechu y espaldes. La fachenda y floréu del mozu Xacinto, non yera´l paxellu de tela a rayes,nin los botinos de goma con punteres rebitiaes; yera un pañuelín colloráu qu´enrollaba al so llargu piscuezu, coles puntes ximielgándose sol hombru: un gorretu encantiáu na vidaya de la mano zurda y un rizu qu´a moo d´un rau de gochu sofitiábase en metá per metá de la frente, y si ta yera poco too isto entovía llevaba baxo´l brazu una ramiquina d´avellano verde que mialma, mialma facíalu más garbosu y gayasperu. Una cosa tenía Xacinto: utra cosa qu´asina Dios me salve facialu ser el regüeyu de tou el llugar: la envidia de los galanes y la dentera de les moces. Xacinto cantaba lo mesmo qu´un ánxel. ¡Quién lo diría al ver aquel mozacu llargo y pingón! Pos malapenes se ponía un pocoñín cimbláu al par de la gaita, carraspiaba, cuspía y comenzaba a subir y baxar la nuez cuandu del gargüelu aquel sortía como per encantu una voz de Xana, que quedaben plasmaos cuantos la oyíen. Y al cantar una copla, maliciosa voltiando los güeyos añándose so la pata derecha y metiendo´l focicu pel punteru allí yera gustu ver la xente arrodialu y falar plasmaos. -Canta abondo bien Xacinto. -El diañu lleve canta que….. canta diz un vieyu echándioles de razoneru. Y el mozu faciéndose´l desentendíu espurría´l gañote y llanzaba utra copla mía en malicia entovía. Lo mío Telva y´una Telva la más guapa de les Telves, lo que yo quiero a mio Telva llévolo en les entreteles. Por güeño: allancó´l carru, torcióse la mistá y por poco non tuvo, que les cibielles gufasen nel alto y los llombos resquemasen de les puñaes, golpes y moquetes. Telva, yera una moza pequeña, prieta y respingada: bien trabada en carnes, llambiduca y faladora. Enrabicóse na cabeza´l dar amoríos a Xacinto, faciéndolu derabiar con el fíu de Pericón de Güeria un rapazucu rellucíu con más llengua que manes, encalecíu y de pocu xeníu. Falaba Telva, explicativa y agasyaspera al par del galán, y Xacinto mirábalos de regüeyo sin más nin más entama utra copla: La mío Telva y´una Telva la más boba de les Telves lo que yo quería a Telva baxó al picu les madreñes. Sonó un palu, llantáu en cabeza dura, arremolinóse la xente, fuxó Telva per ente les muyeres y nel suelu quedó´l fiu de Pericón dando berríes y sangrando como un coríu. Vieyos y mozos arrodien a Xacinto. -Baxa la flema mozu -diz el vieyu razonador. -Non t´atorrugue chacho -fala utru. -Telvuca había ser-tan paraxismera ye. Y Xacinto rucando los dientes, cho palante, sin que cantara cantar delgún. ........... Ye la fiesta del llugar,dí de sol, d´allegría. Restallen los voladores, ruxen les esquiles, sórbise a tarreñaes la sidre, sulten los bolos, casquen les ablanes, llucen los paxellos nuevos y a la vera d´un matu dos mozos falen callandino y mimoso. Son Telva y Xacinto. Ella ríyese con so boquina d´ánxel, él ponse tiesu so les pates llargues y el pañuelu colloráu engaramítase más entovía, y la varina d'avellano ta fresca como la amor en sos corazones. Atardez en l´aldea asturiana. Les moces crucien les cañaes, ixuxus al peracabar son cantares y la gaita sona con su son tembleque. Xacinto dexó a Telva na puerta de casa allegre y gayaspera, mientres pela parte d´una sebe pasa un mozu cola cabeza llena de trapos y la cara atristayá. Xacinto espurre les zanques caleya abaxo y atopa´l gaiteru-¡Alto!-La gaita ye pa mín solu, pos hoi canto yo pa mín y pa la mio Telva. -Toca gaiteru: toca y anda, yá verás tú quien ye Xacinto Cantarines. Y entrambos a dos echen andar y ansí van peles caleyes y en los montes, valles y barrancos, óyese l´eco del cantar amorosu de Xacinto... La mio Telva y´una Telva la más guapa de les Telves lo que yo quiero a mio Telva llévolo en les entreteles.