******************************************************************************+
Tiadoro Cuesta:

		"A LA MEMORIA DE CAVEDA"



FONTE: 

" POESÍAS SELECTAS EN DIALECTO ASTURIANO "
(recopilación de Xosé Caveda reeditada y aumentada por Fermín Canella
en 1887)

Respétase la grafía orixinal, asina como los títulos y comentarios en castellanu.
*********************************************************************************


A LA MEMORIA DEL EMINENTE SABIO ASTURIANO

EXCMO. SR. D. JOSÉ CAVEDA,

EN EL PRIMER ANIVERSARIO DE SU FALLECIMIENTO.
	________________________________


	  Quien cunta por maniegues los doblones
	 Y el que pide por Dios un garitucu ;
	 Quien se tarta de pavos y pichones
	 Y el que nunca con pavu 'ntó 'l focicu ;
	 Quien fíu y nietu ye de mil mandones 
	 El homilde, el soberbiu, el probe, 'l ricu .
	 De la nada son fechos y á la nada 
	 A la postre se ván de la xornada .
					'
						T. C.



  Si en poder el desEu se trocara
Y del crániu metánes, na mollera
El ñeru de les muses s' afayara
¡ Ay qué versos tan chuscos hoy fixera ; 
Un por un , los más dulces extremara
Y cual sartes de perles los texera ,
Pos miániques ansina la memoria 
Honrás' del sabiu , q' algamó la gloria .

  Pero ¡ probe de mí' non quito 'l cielu
Que dientro del mió ser , la foguerina ,
Q' atiza un anxelín  , tomase vuelu
Y mió pluma guiás' so lluz devina ;
Cúido ; válgame Dios ! que d' isti suelu
Con CAVEDA fuxó la pelegrina
Musa que lu allumaba , y en 'a fosa 
El poeta descansa co la diosa .

  Al oyer de sos versos la dolzura
Empapiella 'l xilgueru 'na enramada
Y fuxe amusgadín á la espesura
Sin pensar en 'a fema idolatrada ;
Cuando fai de l' aldea la pintura ,
Y á Tuxa nos presenta enquillotrada ,
¡ Juasús ! ¡ Siñor ! ¡ Juasús ! fasta les coses ,
S' esmucen en sos tallos llagrimoses .

  Quién la pena del alma y la cruxía 
Pintará de la madre que velaba ,
Cabo 'l so rapacín , que 'n fiebre ardía
Pos la bruxa Rosenda lu agüeyaba ?
- ¡ Ay ! ¡ vixu de to má ! séle decía . . .
Y al pensar que so amor 'na siega estaba 
Y el ánxel va á fuxir , reza y sospira
Al amorosu son de dulce lira .

  Yo lleí de cien sabios afamaos
El fruto de so cencia y gran talentu .
Co 'laurel munchos d' ellos coronaos 
Y á los que 'l mundo fexo acatamientu ; 
Pero el diablu chamusque sos forcaos ,
Q' á ser xuez d' unos y útros , al momentu ,
Al que lloramos hoy , donas' la palma ,
Pos dexó 'n sos escritos ver su alma .

  Alma xentíl , preñada de caricies 
Cual de rayos de lluz risca l' aurora ;
Tesoru de consuelu y de delicies ,
Mezcla de risa y llantu que 'namora ;
Palombina sin fiel , ramu d' albricies ,
Templu de caridá , vertú que adora ,
¿ Qué munchu que 'n tal xoya s' añerára
El mesmu Dios y fóse quién dictara ?

  Pruyóme deprender del asturianu
La dulce fabla y el decir melgueru
Y ya de rapazúcu 'l monte y llanu
Alegré co les sones del punteru ;
Y cuando persumí ¡ persúmu vanu ! 
Que quiciás 'n el falar fos' el primeru ,
Lleí los Namoráos de l' aldéa
Y el rixu se me fó d' aquella idéa .
	
  ¡ Cuantes veces llegué á pedir conseyu 
Al ilustre varón , que bondadosu , 
Non miraba que yo fos' un arbeyu
De so xeniu al empar y él un un celosu ;
Si aportaba allentáme, 'n el pelleyu
Non cabía de gusto, Dios piadosu !

  Non basta pa escrebir 'n isti dialetu
Saber que coses son , fabes , morcielles , 
Taragañu, vadril, turrión , magüetu ,
Cerviguera, barruntu , foscu , estielles ;
Espatuxu , vidayes , fuin , focetu ,
Guírriu , fégado , cuayu ó cosadielles ;
ye menester q' oyendo la lletura
Envidie 'l italianu so dulzura .

  Isti fo 'l so pensar, y vieno un día
En q' al mundo prebó , que 'n isti suelu
U 'l ñeru fincó Dios de l' alegría ,
La fabla falenque se fala 'n cielu ;
El solu tal milagru fer podía ,
Pos el que ya 'stá 'n gloria y fói mió güelu ,
Cuntó que de CAVEDA 'n el bautizu
Vieron á Apolo amorosai el rizu .

  El yera per atroz , pos los pinceles ,
Esclavos de so antoxu , retrataben ,
Montes , páxaros , flores y utru Apeles
Cuando mozu , los vieyos lu llamaben ;
Del so violín los sones , dulces , séles , L'
alborada risueña sonsoñaben , Y mostrósc
'nes artes tan, arteru Q' Apeles , com'
Apolo fó , y Homeru.

 El pesu 'n oro y fiel de la xusticia
Tuvo sin taramieyu , y bon cristianu ,
U asomaba 'l focicu la malicia
Pa pizcalla trocábase 'n milanu ; 
Fó reutu 'n el mandar , que quién anicia
Un corazón en sí , tan noble y sanu ,
Como 'l Supremu Xuez, prémia y castiga
Pos gozu dá 'l clavel y ascu la ortiga .

 La güestia , cabruñando so gadaña ,
Firiólu y vieno abaxo la llumbrera 
Gloria del suelu astur , honra d' España ,
Cuyu recuerdu fiel guarda y venera ;
Non fó quién ésta vez , que si con saña
D' allendar i quitó , más duradera 
Vida la muerte i dá , pos so memoria
En lletres d' oro guardará la Historia .
	
  ¡ Pos non faltaba más ! q' esa señora ,
Que ruxe al rebalgar sos palitroques ,
Con una facetada , ¡ bono fora ! 
igualás' á las sabios  y bodoques ;
Nunca fó , nin será . . . sobra una hora ,
Pa olvidase de reyes ó de Roques
Si ciruelos nacieron, mas del Sábiu
Quien s'olvida, á si mesmu fáise agraviu .

  Perdona , ¡ oh noble pueblu ! pintar quixe
So talentu y vertudes , pero legu , 
Ya lo ves , un borrón fó lo que fixe
Pos la lira 'n miós manos ye un llaviegu ;
Perdona , que la pena que m' aflixe 
Y el resplándiu q' él dá , déxenme ciegu ;
Bien me pruye 'l cantar , mas ¡ ay ! el llantu
Ye pá pérdiga tal el meyor cantu .

  ¡ Adios ! ya lo sabeis , non quixo 'l cielu
Que dientro del mió ser , la foguerina ,
Q' atiza un anxelín , tomáse vuelu
Y mió pluma guiás' so lluz devina ;
Cuido , ¡ válgame Dios ! que d' isti suelu
Con CAVEDA finó la pelegrína 
Musa que lu allumaba , y 'na fosa
El poeta descansa co la diosa .