*************************************************************

D. Rufino Martínez Vázquez (1864-1910):

"La casa del señor cura nunca la ví com’agora"


FONTE:

"Los nuevos bablistas" (1925)
(Enrique García Rendueles)


Respétase la grafía orixinal.

***********************************************************************


LA CASA DEL SEÑOR CURA
NUNCA LA VÍ COM' AGORA


Ye á media nochi. La lluna
Pasía 'l cielu fachendosa
Dando lluz á los flequinos 
De la fueya que se 'ncloya 
Direchina pal camin, 
En el que faciendo sombra, 
Debuxa cuando se xinga 
Culiebrines que se 'nroscan. 
Llancia el vientu so quexina 
Suaviquina y amorosa; 
Xime 'l céfiru blincando 
Per cima de la' mapola.
Y de lexos trai el eco
El espirar de la copla: 
La casa del señor cura 
Nunca la ví com' agora.
-Ya vien Pín, diz nel balcón
Una neña qu' afanosa 
Escluca por el ramaxe 
De la vecina güertona. 
¡ Qué bien canta !... Xuraría 
Que non me quier á mi sola, 
Que ye un mozu tan guapín 
Que con los güyos emboba. 
Ya s' acerca... voy faceme 
Que non t i... ¡ que bono fora 
Que al non veme se marchara !... 
Pos non márchome, ¡ qué boba ! 
Ya lu veo... vióme él, 
Faime señes co la gorra... 
Non tengas mieu, non, Pín, 
Acércate que toi sola, 
- Y to tíu?...
- Cóm' un troncu.
 - ¿ Esperástime ?
- Una hora. 
- ¡ Está lexones !
- Ya, ya, 
-  ¿ Pero merezlo la moza ?
- Présedes, baxa.
- Iso non. 
- ¿Por qué, muyer?
- Non ye bona 
La brisina pa los niervos... 
Y soy niervosa...
- ¿ Niervosa ? 
Tamién yo sóilo, y de lloñe, 
Vengo á ver á la mió xoya 
Estripando barganales 
Y esguedeyando panoyas; 
¡ Baxa por Dios ! quiero vete 
Más acerquina, palomba,
Quiero coyer to manina 
Y llevala á la mió boca... 
- ¿ Y si tíu se dispierta, 
Y nos topa ?...
- Tu 'stás lloca ? 
Non dispierta la vieyez, 
Présedes, por cualquier cosa.
Esclucaba pel ramascu 
Un rayiquín de l' aurora 
Y oyóse 'l ruidu d' un besu 
Nel rincón de la güertona, 
Al tiempu que' l señor cura 
Gritó, fuera, con voz ronca: 
¡ Présedes ! pero la neña 
Que facíase la sorda 
Dexó que se ' sgañitase 
Sin respondei, la bribona. 
Pas' un ratu; cuando 'l vieyu 
Vióla venir, dixo: - Bona 
Escapatoria ficiste, 
¿ De ú vién la rapaz' agora ? 
Pero ella puxo'l pucheru 
Torciendo un poco la boca, 
Y dixo: - D' estar con Pín, 
Nel rincón de la güertona. 
 - ¿ Y qué ficísteis ?
 -Facer... 
Non ficímos utra cosa 
Que falar muncho... cuntome 
Non sé que diablu d' historia 
D' un mozu qu' enamorose 
Ya fai tiempu d' una moza 
Y que llamábai míó cielu... 
Tesorín... ánxel... hermosa, 
Y qu' un día mediu llocu 
Sin ella querer, besóla; 
Y pa facelo miyor, 
Sigún cuntaba la historia, 
Pín, coyendo mió manina  
Llevóla ansina á so boca, 
Y.
- ¿ Qué fizo, condergá ? 
- Non fizo nada... besóla. 
Coyó 'l vieyu 'nfurecíu
Per una oreya á la moza; 
Metióla 'n casa, y dispués
Corrió á la puerta y trancóla.
Subióse triste al balcón 
Diciendo: ¡ Juasús qué porra ! 
¡ Qué habrán fecho 'stos diablinos
Nel rincón de la güertuna !
Entanto, Pin, ya lexones,
Cantaba la alegre copla:
La casa del señor cura
Nunca la ví com' agora.