Urdangarin ha de presentase en prisión enantes del llunes

|
Urdangarin ha de presentase en prisión enantes del llunes

Iñaki Urdangarin, maríu de la infanta d’España Cristina de Borbón y Grecia, recoyó na mañana del miércoles na Audiencia de Palma la notificación d’ingresu en prisión pol 'casu Nóos'. Dende esi momentu tien cinco díes pa presentase en cualquier centru penitenciariu pa cumplir una condena de 5 años y 10 meses.

El Tribuna Supremu falló ayeri’l recursu de casación presentáu por Urdangarin nos que solicitaba l’absolución tres la sentencia de l’Audiencia de Palma dada a conocer nel 2017 de 6 años y 3 meses de cárcel polos delitos de prevaricación, fraude, tráficu d’influencies y dos delitos contra la Facienda Pública. Mientres, la condena pal so sociu Diego Torres foi de 8 años y 6 meses.

La revisión de la sentencia mengua la pena d’Urdangarin en cinco meses al entender los maxistraos que nun queda probáu’l delitu de falsedá, pero caltienen que l’ex xugador de balonmanu emplegó la so figura de xenru del rei d’España como trampolín p’algamar contrataciones de naturaleza pública, eliminando cualquier tipu de competencia. Pela so parte, Torres sal más beneficiáu, al ver reducida la so condena a 5 años y 8 meses de prisión.

Dambos tienen cinco díes pa presentase en cualquier centru penitenciariu del Estáu pa cumplir la so pena. Urdangarin entovía cuenta cola vía de presentar recursu énte’l Constitucional, pero esti pasu difícilmente lu llibraría de la cárcel.

Semeya obra de Zugaldia baxo llicencia CC BY 2.0.

Contador Estadistiques