La Vuelta torna a incumplir la toponimia oficial cola permisividá del Gobiernu

Presentóse'l percorríu de la carrera, cola confirmación de los finales n'Uviéu y La Cubieḷḷa amás del yá anunciáu de L’Acebu.

La Vuelta 2019 va aportar a Asturies dende Cantabria'l sábadu 7 de setiembre, no que vas ser la decimocuarta etapa, con percorríu pela costa hasta Xixón, pa xubir La Madera y siguir per Noreña pa finar nun más que previsible esprín n'Uviéu. Va ser la preparación pa dos xornaes siguíes de monte con dos finales inéditos na carrera ciclista: L'Acebu y La Cubieḷḷa.

El primeru, sicasí, nun ye desconocíu pol pelotón, al ser un clásicu de la Vuelta a Asturies. La etapa, que va coincidir col Día de la Nación Asturiana, va salir de Tineú y va tener un primer pasu per L'Acebu ensin llegar a ascendelu dafechu, pa siguir hacia Cangas y xubir dos primer categoría, el Pozu las Muyeres Muertas y El Counio.

Tamién va ser final d'etapa per primer vegada en La Vuelta La Cubieḷḷa, un puertu tamién de categoría especial que destaca pol so llargor, 28 quilómetros, mui al estilu francés. Pravia va ser el puntu de salida pa tomar direición a Grau tres el pasu per dos tercer categoría y xubir darréu dos primera, el Marabiu y La Cobertoria, hacia La Pola Ḷḷena y La Cubieḷḷa.

Na Comunitat Valencia, Catalunya, Navarra y Euskadi, sí

La noticia desagradable que trai esta anuncia del percorríu celebrada ayeri n'Alacant ye qu'Asturies sigue siendo l'únicu territoriu con llingua propia onde la toponimia oficial, esto ye, la tradicional, nun se respeta. Tanto na Comunitat Valenciana como en Catalunya, Navarra y Euskadi los nomes de llugar son los propios d'estes comunidaes autónomes.

Asina, topónimos yá derogaos como 'El Infanzón', 'Tineo' o 'Grado' apaecen nel llibru de ruta en cuenta de los oficiales L'Infanzón, Tinéu o Grau, por citar unos pocos. Esta situación dase dada la permisividá del Gobiernu, nun asuntu que depende de Turismu y non de Deportes (Educación y Cultura), a pesar de les denuncies que se vienen faciendo añu tres añu dende medios de comunicación y coleutivos de defensa del idioma.

Isaac Pola, conseyeru d'Emplegu, Industria y Turismu acudió a la Comunitat Valenciana al actu de presentación de La Vuelta 2019 xunto con Julio González Zapico, direutor xeneral de Comerciu y Turismu. Éstu tuvo llugar nel Auditorio Provincial d'Alacant al ser nesta ocasión salida de la carrera Torrevieja.

Na semeya, Coque Montero, coordinador xeneral de la Vuelta a Asturies; Cristina Mendo, direutora de la Vuelta a Asturias; Pola; Javier Guillén, direutor de La Vuelta; y González Zapico.