González Rodríguez cuerre l'Antarctic Ice Marathon & 100k na Antártida

|
González Rodríguez  cuerre l'Antarctic Ice Marathon & 100k na Antártida

El xixonés sigue col so retu de facer ocho carreres de más de 100 quilómetros en tolos continentes. Namái diez corredores s'atreven con esta dura prueba n'Union Glacier.

A la base privada estauxunidense na Antártida aporta güei Fernando González Rodríguez dende Punta Arenas pa competir mañana na Antarctic Ice Marathon &100k, que se va celebrar nun horariu por confirmar que va depender de les condiciones climatolóxiques del día. Per delantre va tener cien quilómetros que, con casi toda seguridá, va afrontar en solitariu.

"Voi intentar ganar, pero nun me val otra cosa que nun sía podiu", afirmó dende Chile a Asturies.com el xixonés. "Nestes carreres en climes polares lo más importante ye controlar la temperatura corporal pa nun entrar n'hipotermia. Y anque la ropa ye mui bona, el cuerpu ta húmedu, y si baxes muncho'l ritmu entames a enfriar", esplica al tiempu qu'anuncia que "camudaré de ropa polo menos a metada de carrera pa tar secu".

Otra de les claves pa llegar a meta con opciones "ye beber muncho porque a estes temperatures piérdese munchu llíquidu y pues deshidratate. Y tamién xintar muncho porque'l gastu calóricu ye brutal y pues garrar una páxara de caballu. Polo demás tar protexíu de los rayos del sol en güeyos y cara y ser intelixente cola estratexa; la carrera ye mui llarga y decidiráse al final", afirma.

Per tol mundu

González Rodríguez llega a l'Antártida depués de correr otru ultra trail n'Australia n'ochobre. D'esta forma'l xixones sigue col so oxetivu de correr ocho pruebes de mas de 100 quilómetros en tolos continentes, pa lo que-y quedaría namái facelo nel Polu Norte, onde yá percorrió nel 2011 una distancia de maratón.

Les persones interesaes en siguir l'Antarctic Ice Marathon &100k pueden facelo en direuto nel Facebook de la competición.

Contador Estadistiques