Siete asturianos van presentar denuncies por crímenes del franquismu énte’l Consuláu arxentín

|
Represaliaos y familiares de víctimes del réxime franquista van viaxar a Madrid pa presentar el vienres siete denuncies énte’l Consuláu d’Arxentina por crímenes nesa época prieta. Los casos van remitise a la xueza que lleva la ‘Querella Arxentina’.
 
Dende'l mes de setiembre, Arxentina habilitó los sos consulaos en tol mundu pa que puedan recibir denuncies de víctimes del franquismu, depués d'una solicitú fecha nesi sen por María Servini de Cubría, evitando asina que los denunciantes tengan que viaxar a Buenos Aires. Esta xueza ye la responsable de la nomada ‘Querella Arxentina’, causa abierta nel 2010 qu’investiga los crímenes del franquismu y que ye la esperanza principal de munches persones pa xulgar a los responsables d’asesinatos y tortures que quedaron impunes dafechu pola Llei d’Amnistía española del 1977.
 
Ayeri, por iniciativa de La Comuna d’Asturies –que trabaya na presentación de querelles nueves–, grupu asturianu que forma parte de la Coordinadora estatal d’apoyu a la Querella Arxentina contra crímenes del franquismu (CeAQUA), presentóse nel Conceyu Abiertu d’Uviéu la delegación asturiana que va viaxar a Madrid pa presentar énte’l Consuláu arxentín un total de siete denuncies que sumar a la ‘Querella arxentina’. Cuatro d’elles van treslladales persones que foron víctimes direutes del franquismu, casu de Manuel José García Valle ‘José’l Gallegu’, Faustino Sánchez García, Vicente Gutiérrez Solís y Anita Sirgo Suárez, mentes que los familiares d’Aida Alvaré y José Martínez Vázquez, Clemente Amago y Jesús Fernández Pérez, van facer lo propio. Hai que destacar que dalgunos de los torturadores y asesinos d’estes persones siguen con vida.
 
El resume de les histories de cáun d’estes víctimes del franquismu ye la siguiente:
 
·         Aida Alvaré Marqués José Martínez Vázquez foron sacaos de la cácel d'Avilés y fusilaos na playa de Salinas el 22 d’ochobre de 1937. Los sos cuerpos dexáronse ellí. Nel pinal d'esa playa hai una fosa con más de 300 asesinaos que nunca s'escavó. José Abargues Perles yera secretariu del Partíu Comunista de San Esteban (Muros) y incorporóse al frente en defensa de la República. Foi condenáu a muerte por "rebelión militar" y fusiláu’l 28 de setiembre de 1939, y ta enterráu na fosa común d'Uviéu. La so muyer, Josefa Dávila Álvarez, embaranzada y con seis fíos, tuvo presa en Pravia y Uviéu, onde tuvo la última fía, pa pasar depués a Saturrarán (Guipúzcoa), prisión onde cumplió la condena por "ausiliu a la rebelión" hasta'l 29 de abril de 1943. Son cuatro casos de los munchos exemplos de la represión sistemática de les autoridaes franquistes n’Asturies. Dos nietes d’estes cuatro víctimes presenten una denuncia esplicando les sos histories.
 
·         Clemente Amago López-Villar yera l’alcalde del conceyu de San Tiso d’Abres en 1936 pol Partíu Socialista. Un mes depués del golpe d’Estáu de Franco, la zona estremo-occidental asturiana yá taba en poder de los sulevaos. Les detenciones y tortures por parte de la Falanxe llevaron a Clemente a escondese en monte cerca de so casa en Vilela. El 1 de setiembre los falanxistes de San Tiso prendiéronlu y torturáronlu. La so muyer pudo velu a otru día, sangráu y medio muertu, nun camión camín de Lugo. Nun volvió a velu más. Unos años depués, so viuda tuvo que pagar una multa que-y punxeron a Clemente Amago por desatender les sos funciones como alcalde. Na denuncia que presenta’l so nietu cítense otros cinco casos d’asesinatos y desapaiciones socedíes nesi conceyu naquel mes de setiembre de 1936.
 
·         Jesús Fernández Pérez yera un albañil de Mántaras (Tapia) qu’encarcelaron na Casa Conceyu de Tapia nel mes de payares de 1936, cuando tenía 33 años. Un grupo de miembros de la Falanxe, conocíos na zona como “El Cangrexo”, sacáronlu pela nueche de la cárcel y la so muyer, con una neña de seis díes, nun volvió a saber más nada d’él. Dizque lu mataron nel conceyu lugués de Barreiros, anque nun se sabe ónde ta enterráu. El so casu ye ún más de los asesinatos cometíos na zona occidental asturiana con tola impunidá y col consentimientu de les autoridaes municipales franquistes. Na denuncia que presenta’l so nietu cítense otros casos d’asesinatos, encarcelamientos y vexaciones cometíos nel conceyu de Tapia nesos meses.
 
·         Manuel José García Valle, ‘José’l Gallegu’, sufrió a lo llargo la so vida despidos, detenciones y prisión pola so implicación política nel Partíu Comunista y pol so llabor sindical na mina. De 1957 a 1971 detuviéronlu 14 veces. Sufrió tortures y palices de personaxes desgraciadamente conocíos en Asturies como’l comisariu Claudio Ramos, de la Brigada Político-Social, el sarxentu Pérez o’l guardia Sevilla. Na denuncia que presenta da testimoniu de la detención sufrida en Sama’l 7 d’agostu de 1963 a manes del capitán de la guardia civil Fernando Caro Leiva, unviáu a Asturies pol ministru de la Gobernación Camilo Alonso Vega pa reprimir les fuelgues mineres. La vida de llucha de José’l Gallegu cúntase nel llibru A mí hay que matarme de frente. Manuel García Valle, José el Gallegu, minero comunista, del historiador Jorge Muñiz.
 
·         Faustino Sánchez García empezó a sufrir detenciones pola so actividá sindical y política nel Partíu Comunista dende 1961 nel valle del Nalón. Ente los sos torturadores taben el sarxentu Osorio, el sarxentu Pérez y el guardia Sevilla. Sufrió prisión y perdió’l trabayu na mina. Depués de ser despidíu por participar nuna fuelga n’otru pozu, pasó a la clandestinidá y escapó al estranxeru. En mayu de 1969, en Sama, volvieron a prendelu y sufrió les tortures del comisariu Claudio Ramos y del policía Pascual Honrado de la Fuente. Con delles costielles rotes, amás de los tímpanos, metiéronlu na cárcel. Salió absueltu depués de tar mediu añu presu ente Uviéu y Carabanchel.   
 
·         Vicente Gutiérrez Solís significóse pol so trabayu d’organización del Partíu Comunista nos pozos mineros dende 1955. La so primer detención en La Nueva depués de la fuelga minera de 1957/58 llevólu con otros compañeros a la comisaría d’Uviéu, onde sufrió palices de Pascual Honrado de la Fuente y el comisariu Ramos. A la salida de la cárcel en 1961, despidíu del pozu, negáron-y volver a trabayar na mina pola so implicación política. Volvió a sufrir detenciones y palices n’otres fuelgues y tuvo deportáu con otros compañeros fuera d’Asturies. Tuvo qu’escapar a Francia, d’onde volvió en 1966, anque siguieron les detenciones, les palices y la cárcel en diferentes momentos hasta la última detención, en 1977.
 
·         Anita Sirgo Suárez foi una de les víctimes de tortures na fuelga de 1962, fechos que xeneraron una fola de solidaridá y denuncia en tol Estáu y na comunidá internacional. A Anita prendiéronla col so home en Sama, cuartel onde sufrieron, con otros compañeros y compañeres, les palices y les tortures de Fernando Caro Leiva. Depués de rompe-y el tímpanu d’un oyíu por culpa de los golpes, Caro Leiva afaitó-y la cabeza a tirones a Anita con una navaya. Les palices siguieron de la mano de Claudio Ramos nel cuartel de Buenavista d’Uviéu. Anita nun dexó la so implicación política nel Partíu Comunista y tuvo qu’escapar a Francia. Al volver a Asturies siguió sufriendo estancies de dellos meses na cárcel, por exemplu, alredor de tolos Primeros de Mayu, siempre ensin xuiciu nin rexistros, hasta’l final de la dictadura. 
 
 
 
Contador Estadistiques