De la Rasilla: “Cuando llegó’l primer sapiens a la Península equí nun quedaba nengún neandertal”

|
L’espertu en Prehistoria Marco de la Rasilla esplicó al públicu qu’enllenó la sala d’actos del Atenéu Obreru de Xixón tolos detalles sobre’l xacimientu de Sidrón y los trece neandertales atopaos nél. Foi na charra mensual entamada por Ástura.
 
Baxo’l nome de ‘Neandertales de Piloña: xacimientu estraordinariu, referencia mundial', De la Rasilla principió la so intervención esplicando los detalles de la cueva piloñesa y el llugar onde s’atoparon los restos de los trece neandertales, de difícil accesu. Pa ello, ayudóse de semeyes y gráficos que permitieron a los presentes treslladase a esta cueva que coloca a Asturies na primer plana de la investigación científica mundial. La razón pola que los güesos llegaron al furacu nel que se depositaron debióse, según esplicó De la Rasilla, “a unes tormentes enormes y una colada de barru brutal”, esto ye, “por razones naturales”. Asina, dada la rapidez del so depósitu, los restos pudieron conservase bien hasta los nuesos díes. D’igual forma, l’espertu informó de que tovía ta investigándose cuál yera’l llugar orixinal onde taben los güesos y si habría ellí un enterramientu.
 
El segundu puntu a trata yerar la datación de los restos, esplicando los distintos estudios fechos. El primeru señalaba que tendríen 10.000 años enantes del presente, mientres que’l segundu situábalos ente los 34.000 y 41.000. Sicasí, los que estudios paecen más esactos son los del Laboratoire des Sciences du Climat et l’Enviroment francés que, yá nel 1996, dató los güesos sobre’l 49.000 enantes del presente, estudiu coincidente colos que presenta anguaño la Oxford Radiocarbon Accelerator Unit tres tratar de quitar contaminación de la muestra. “La más vieya ye siempre problablemente la más válida”, comenta De la Rasilla, que considera, con casi toda seguridá, “que cuando llegó’l primer sapiens a la Península Ibérica, sobre’l 36.000 enantes del presente, equí nun quedaba nengún neandertal”. D’igual forma, apuntó que cuando la segunda salida d’África de sapiens, sobre’l 70.000, hubo hibridación y contautu ente les dos especies d’homínidos na zona que güei correspuende a Siria y Xordania.
 
Sobre les carauterístiques de los neandertales, destacó que “yeren fuertes, trabaos, d’esqueletu robustu y con dientes mui potentes”. Asina, pasó a esplicar les carauterístiques de los treces exemplares atopaos en Sidrón: siete adultos (la mayor, una muyer de 35 años), trés adolescentes (alredor de 14 años), dos xuveniles (ente 8 y 10 años) y un neñu de 2 a 3 años. La estatura media de los adultos yera de 1,64 metros, midiendo’l más altu 1,73 y el más baxu, 1,55. Toos yeren diestros, menos ún que tuvo qu’adaptase a utilizar la zurda por un problema con un diente.
 
Episodiu de canibalismu
 
El profesor titular d'Historia pola Universidá d'Uviéu, llicenciáu en Xeografía y Historia pola Universidad Complutense de Madrid y doctor en Xeografía y Historia pola institución uviedina, esplicó que estos trece homínidos sufieron “una práutica de canibalismu nidia”, dalgo que se demuestra polos güesos fracturaos y les marques nellos, como bien amosó nuna semeya. Lo que nun sabemos tovía ye si esti episodiu “foi d’endocanibalismu o exocanibalismu, y por cuestiones alimenticies o rituales”.
 
No que respeuta a los estudios xenéticos, que principiaron nel 2005, el gran problema atopáu nos primeros años “yera la contaminación por ADN modernu”. Tres la incorporación, nel 2007, al proyeutu Xenoma Neandertal, en Sidrón síguese un protocolu d’actuación consistente na conxelación de la muestra pa qu’esta nun se contamine. Asina, depués de l’apaición d’un restu, tolos presente marchen del llugar y vistense con un traxe especial –“d’astronauta”, bromió De la Rasilla–. Darréu, introduzse’l güesu nuna bolsa y ésta nuna nevera, pa depués conxelalu y nun romper la cadena de fríu hasta la llegada al llaboratoriu. Hai que destacar que’l xacimientu de Sidrón foi’l primeru del mundu en siguir esti protocolu, asina como n’estudiar los xenes nucleares, lo que permitió conocer muncha información sobre los neandertales de Sidrón.
 
L’espertu tamién trató sobre les ferramientes utilizaes, faciendo un ecu especial nel sílex de Piloña y comparando la zona onde ta la cueva con un hipermercáu de la época d’esta variedá del cuarzu. Pa finar, De la Rasilla solventó les duldes del públicu, que llegó a entrugar sobre l’apoyu de les alministraciones al xacimientu: “El proyeutu de Sidrón foi y ye financiáu pola conseyería” y cuenta con un conveniu de collaboración cola Universidá d’Uviéu, polo que nun tien quexa al respeuto.
 
Na semeya, De la Rasilla y Amadéu Benavente, vocal d’Ástura.
 
Contador Estadistiques