De la Rasilla va falar sobre’l xacimientu de Sidrón na charra mensual d’Ástura nel Atenéu Obreru

|
‘Neandertales de Piloña: xacimientu estraordinariu, referencia mundial' ye’l títulu de la charra mensual d’Ástura, que nesta ocasión protagoniza Marco de la Rasilla. L’espertu en Prehistoria va averar a los presentes el xacimientu de Sidrón.
 
Llicenciáu en Xeografía y Historia pola Universidad Complutense de Madrid (1980), doctor en Xeografía y Historia pola Universidá d'Uviéu (1987) y profesor titular d'Historia pola Universidá d'Uviéu, amás de collaborador y direutor d'escavaciones arqueolóxiques en xacimientos prehistóricos como Abrigu de la Viña, Cuetu la Mina, Llonín y el Sidrón, De la Rasilla va centrase neste charra na cueva piloñesa. Asina, va esplicar “l’estáu actual de les investigaciones, esplayando l'orixe y les circunstancies del descubrimientu de los 13 neandertales de Sidrón 49.000 años depués de morrer, les sos desemeyances col sapiens actual, les conocencies que mos apurren los dentames atopaos y l'ADN mitocondrial, delles carauterístiques físiques demostraes, la capacidá de llinguaxe, la bayura del sílex piloñeso o les prebes de canibalismu”, apunten dende Ástura. Pa ello, va ayudase de semeyes.
 
El Sidrón trátase d’un xacimientu descubiertu nel añu 1994 por dos espeólogos xixoneses, anque les investigaciones na cueva nun principiaron hasta seis años depués. L’afayu d’alredor de 1.400 restos de neandertales convirtiéronla nun puntu de referencia mundial pal estudiu d’esta especie d’homínidu qu’habitó toda Europa y parte d’Asia y que llegó a convivir cola nuesa especie. La charra de De la Rasilla ta prevista pa les 19.30 hores na sede del Atenéu Obreru de Xixón, asitiada na cai Cuadonga númberu 7, con entrada llibre.
 
Na semeya, De la Rasilla (segundu pela izquierda) el pasáu mes febreru nel actu d'inauguración de la esposición sobre les escavaciones arqueolóxiques nel xacimientu de Sidrón.
 
Contador Estadistiques