L’Arribada conderga l’actitú “antiasturiana” del edil Vilabrille tres bilordiar sobre l’Arcu Atlánticu

|

Un ataque de Justo Vilabrille al Festival Arcu Atlánticu y a L’Arribada, por supuestu tratu de favor, llevó a l’asociación cultural a asoleyar un comunicáu de respuesta a los bilordios del edil. Nél condena l’actitú “antiasturiana” del socialista.

Fiel a la campaña entamada dende un aniciu pol PSOE contra’l certame creáu hai dos años por iniciativa del conceyal de Cultura, Educación, Festexos y Mocedá, Carlos Rubiera, Vilabrille calificó nunes declaraciones asoleyaes güei pol diariu ‘La Nueva España’ de “eleutoralismu puru” la puesta en marcha de la tercer edición del Festival Arcu Atlánticu. D’igual forma afirmó que l’eventu “nun aporta nada dende’l puntu de vista cultural a esta ciudá” y que nun conserva l’espíritu anicial de servir d’intercambiu comercial ente países.

D’igual forma, cargó contra Humberto Gonzali, ún de los representantes del PP na xunta rectora del Patronatu de la Fundación Municipal de Cultural, Educación y Universidá Popular, que votó a favor de l’aprobación d’una asignación de 194.000 euros –l’otru popular, astúvose– pa la programación del Festival Arcu Atlánticu, votu necariu pa sacar alantre la propuesta. Asina, tachó de “impresentable” que la so muyer, como presidenta de L’Arribada, recibiera 22.000 euros por actividaes contrataes dientro del festival, dalgo que nun se sostién dende’l momentu nel que’l verdaderu “presidente de la nuesa asociación cultural ye Alberto Álvarez Peña” y que “la persona citada nunca ocupó la presidencia”, apunten dende L’Arribada. Vilabrille tamién mencionó al fíu de Gonzali, Illán, responsable de Gonzali Producciones, empresa que’l Festival Arcu Atlánticu contrató pa dos actividaes. Tampoco nun se llibra d’estes crítiques Rubiera, al qu’acusa de premiar a determinaos coleutivos y condegar a otros.

“Declaraciones llamentables, malintencionaes y repletes de falsedá y ataques al honor de les persones”

Dende l’Asociación Cultural L'Arribada nun tardaron en salir al pasu de “unes declaraciones llamentables, malintencionaes y repletes de falsedá y ataques al honor de les persones” con un comunicáu nel que faen delles puntualizaciones al tiempu que conderguen a Vilabrille “pola so actitú claramente antiasturiana”. En primer llugar, recuerden que “L'Arribada nun ta venceyada a nengún partíu políticu” y que cuenta con  “votantes de toles sensibilidaes ideolóxiques presentes n’Asturies” na so direutiva. Amás, señalen que “nes nueses propuestes siempre s’escluyó cualquier tipu de sectarismu, lo que por desgracia nun yera la norma pa ciertos eventos mui cercanos a equipos de gobiernu municipal anteriores”.

Por esti motivu, l’asociación cultural considera “mui graves” les acusaciones del conceyal socialista “cuando ye conocío pola ciudadanía xixonesa qu’él, siendo conceyal de Cultura, integrábase nun equipu de gobiernu municipal que, ésti sí, axudicó cientos de miles d’euros a dalgunes entidaes que se movíen dafechu na órbita del so partíu”. Al rodiu, apunta que nengún miembru de L’Arribada “va embolsase, nin s’embolsó nunca, un euru de dineru públicu pol so trabayu na difusión de la nuesa cultura y la nuesa lliteratura”. Tamién fala de cantidaes “manipulaes” por edil socialista y esplica como 4.100 euros del presupuestu son xestionaos pola Oficina Municipal de la Llingua y nun s’ingresen en cuenta nenguna de L’Arribada, y que’l coleutivu namái s’encarga de l’actividá lliteraria, recibiendo por ello dalgo menos de 6.000 euros, siendo otres asociaciones les responsables del restu de la programación.

Llama-y l’atención a la direutiva de L’Arribada la postura de Vilabrille, que “contradiz lo dicho y fecho por él mesmo en numberoses ocasiones, participando n’actos de L'Arribada de forma mui activa, comprobando y emponderando de forma pública el caráuter abiertu y plural de la nuesa asociación, y aprobando de manera reiterada, na so condición pasada de conceyal de Cultura, l’asignación de partíes económicas pal apoyu al desandolcu de los nuesos programes culturales”. D’igual forma, ven nesti ataque partidista otru despreciu más “a entidaes asturianistes” que padecieron “per décades” en Xixón y que se refuerza dende’l Gobiernu nacional del PSOE cola retirada l’añu pasáu de les ayudes a la promoción del asturianu.

“Énte esti ataque repetíu, l’Asociación Cultural L'Arribada resérvase l’aniciu de les aiciones llegales y/o movilizaciones sociales que considere oportunu en defensa democrática del so bon nome y n’apoyu a la cultura asturiana, en tanto y en cuanto’l señor Justo Vilabrille Linares nun presente la so dimisión como conceyal nel Ayuntamientu de Gijón/Xixón o’l so partíu proceda a demandárelsa, o haya una rectificación por parte del conceyal bilordiante”, fina’l comunicáu.

Na semeya, Justo Vilabrille, xunto con Paz Fernández Felgueroso, nun actu d'homenaxe a los docentes xubilaos del cursu 2009-2010, tiempu nel qu'ocupaba'l cargu de conceyal de Cultura.

 

Contador Estadistiques