L’Unión Financiera anicia n’A Coruña la llucha pol ascensu a ACB

El Leyma Natura y l’Unión Financiera Asturiana vense les cares esti vienres na primer eliminatoria pol ascensu a l’ACB. El conxuntu uviedín afronta esta cita histórica cola intención de ganar y poder sentenciar el domingu 20 en Pumarín.

Los de Guillermo Arenas finaron la lliga regular en sesta posición con 14 victories, les mesmes ques los gallegos –quintos pol basketaverage–, resultaos escelentes pa dos conxuntos qu’en branu ainiciaben la temporada col oxetivu de la permanencia en LEB Oru. El premiu final pa dambos a una campaña escelente ye l’enfrentamientu nesta primer eliminatoria pol ascensu d’esta nueche (21 hores) nun Palacio dos Deportes d’A Coruña que va contar con unes graes enllenes dada la iniciativa de Leyma Nature, patrocinador del Básquet Coruña, de regalar entraes a los aficionaos. Mentes, los siguidores del Unión Financiera Asturiana que nun pueda desplazase col equipu, van poder velu per televisión nel Auditoriu.

L’equipu uviedín viaxó a Galicia cola baxa d’Adrián Macía por motivos llaborales, mentes que nes files del conxuntu coruñés nun ta disponible Samuel Haanpaa, retiráu del equipu por baxu rendimientu, y ye dulda Jesús Castro. Nos enfrentamientos de lliga regular tanto Unión Financiera como Leyma Nature ganaron los dos choques en casa (69-66) y (80-78), polo que s’espera una igualdá máxima. El partíu de vuelta nel polideportivu de Pumarín va tener llugar el domingu 20 d'abril a  les 19 hores, con precios de 5 euros pa socios adultos (3, junior; y 2, infantil) y entraes de públicu a 15 euros (10, junior; 6, infantil; y 2, menores de seis años). Nel casu d’empate, habría un tercer alcuentru n’A Coruña. Ésta ye la primer vegada nos sos nueve años d’historia que los uviedinos lluchen por xubir a la máxima categoría del baloncestu estatal, que nun cuenta con representación del país dende’l descensu del Gijón Baloncesto nel 2002.

El restu d’eliminatories pol ascensu son les siguientes: Ribeira Sacra Lugo-Peñas Huesca, Quesos Cerrato Palencia-Clínicas Rincón Axarquía y Ford Burgos-Cocinas.com Clavijo. El River Andorra, como primer clasificáu, algamó l’ascensu automáticu a ACB.