L’Anguleru ayuda a deprender inglés al traviés de la llingua asturiana
Él nun va poder tar presente, pola so estancia necesaria nel mar de los Sargazos al curiáu de les angules y anguiles, pero sí los sos collacios n’Asturies. Les histories de L’Anguleru van ayudar a deprender inglés al traviés del asturianu.
La cita ta prevista pal vienres, al meudía, na Llibrería del Centru Niemeyer y nella van participar Víctor Raúl Pintado Rey ‘Vitu’, autor del llibru ‘L’Anguleru. Suaños de Navidá’ y coautor de les ilustraciones; Bradley Samore, profesor d’inglés; Tamara Saiz, direutora del Colexu Públicu de Panes; Fernando González, de l’Asociación Cultural Garabuxada; y Samuel Castro, copropietariu d’Ediciones Trabe. Estos collacios de L’Anguleru, amás de presentar la obra con histories navidiegues del máxicu personaxe, van entamar delles actividaes cola fin de que los neños y neñes presentes puedan aprender inglés y perfeicionar el castellanu al traviés de la so llingua materna, l’asturianu. “Esta propuesta didáutica va incorporar de forma natural trés de les llingües que más-y presten a L’Anguleru: l’asturianu, el castellanu y l’inglés, convirtiendo l’actividá nuna novedosa aición educativa de caráuter trillingüe”, espliquen los sos organizadores.
Brad, natural de Florida, y Vitu van encargase de contar les histories a los pequeños, pa depués dar pasu a Saiz, que va entamar un taller de dibuxu y creación de mariquites sobre’l personaxe. Amás, los neños van poder facer cartes pa L’Anguleru que va entregar de manera personal Brad nun altu nel so viaxe a Estaos Xuníos pa pasar les vacaciones de Selmana Santa. Esti profesor d’inglés mozu residente n’Asturies y amante de la cultura del país siempre visita a L’Anguleru nestes feches pa da-y un abrazu, lleva-y provisiones y ayudalu unos díes col so llabor. Los mensaxes pueden tar escritos nos trés idiomes, anque tolos neños saben que la llingua que suel utilizar esti máxicu personaxe que nos visita toles Nuechebones pa pescar angula y, coles perres ganaes cola so venta, mercar regalos pa toos, ye l’asturianu.
Como detalle, tolos neños y neñes qu’acudan al Niemeyer a disfrutar coles histories de L’Anguleru y, al mesmu tiempu, deprender inglés, van recibir gominoles y un regalín qu’unvió’l pescador dende los Sargazos pa los participantes na actividá.