Álvarez Espinar lleva la victoria na VII Carrera L'Asturcón

Martín Álvarez Espinar ganó la VII Carrera L'Asturcón, segunda prueba de la Copa d’Asturies de Carreres de Montaña, que continúa liderando Víctor Fernández Díez, terceru nel Naranco. Marta Escudero repitió trunfu en categoría femenina.

El corredor del Club Piñoña Deporte foi’l primeru en terminar el domingu los 28 quilómetros de percorríu pel Naranco, con 2.400 metros de desnivel, rexistrando un tiempu de 2 hores, 3 minutos y 15 segundos. Finó en segunda posición el veteranu A –de 45 a 55 años– Pedro Rodríguez Cuenca (Picu Dubil) a 1 minutu 45 segundos, mentes que’l sub-23 Fernández Díez (Team Land, federáu col Peña Santa) llegó terceru a 2 minutos y 31 segundos, puestu que-y permite siguir de líder na Copa d’Asturies con 178 puntos. El segundu na xeneral ye Rodríguez Cuenca, con 166, y el terceru, Rubén Álvarez Álvarez (Toscaf Recta Final Trail), cuartu’l domingu, con 160. Álvarez Espinar nun participó na III Carrera per Montaña Puerta de Munieḷḷos, polo que namái suma los 100 puntos de la carrera d’El Asturcón.

La categoría femenina sigue dominada pola campeona actual de la Copa d’Asturies, que fixo un tiempu nel Naranco de 2 hores, 36 minutos y 14 segundos. El segundu puestu foi pa la veterana B –más de 50 años– Ana Cristina Aguado (Reino Astur), a 7 minutos y 15 segundos, y el terceru pa la veterana A –de 40 a 50 años– Eva Braña (Centro Asturiano de Oviedo), a 11 minutos y 4 segundos. Con esti trunfu y el de Mual, Escudero encabeza la xeneral.

La carrera próxima puntuable pa la Copa d’Asturies va ser, el 19 de xunetu, la Resistencia Reino Astur. Ésta tien llugar en Nembra (Ayer) y cuenta con un percorríu de 44 quilómetros, con un desnivel acumuláu de 6.000 metros.