La Tarrancha y Skontra, nos primeros puestos de la votación popular del concursu del festival EHZ

|

Les formaciones asturianes La Tarrancha y Skontra ocupen les primeres posiciones na votación popular del concursu del Euskal Herria Zuzenean Festibala (EHZ). Un total de 77 grupos de cultures minorizaes aspiren a tocar nesti festival vascu.

La llista, a falta d’ocho díes pal zarru del plazu de votación, lidérenla los catalanes The Bombins, col 8 por cientu del total, que presentaron el cantar ‘Toc de castells’, siendo’l segundu puestu provisional pa La Tarrancha con ‘De Tazones a Candás’, que suma’l 6 por cientu d’apoyos. Mui cerca, col 5 por cientu, alcuéntrase un grupín formáu por Skontra (‘Billete ensin vuelta’), los corsos Spiri2all (‘Le droit de vivre’) y los vascos Can of Worms (‘Running dead’) y Eskean KristÖ (‘Iguana’). La mayor parte del restu de formaciones nun algama’l 1 por cientu. Esta primer fase del concursu del EHZ va suponer la metá de los votos, yá que’l 50 por cientu restante va ser decisión d’un xuráu profesional formáu polos músicos Fermin Muguruza, Igor Otsoa y Jurgi Erkiza. El día caberu pa votar na web del certame fina’l martes 15 d’abril y los ganadores van conocese’l 1 de mayu.

El premiu d’esta iniciativa va ser la participación nun recopilatoriu y l’actuación nel festival que se celebra en Lekorne (Iparralde) del 27 al 29 de xunu, certame con venti años de trayeutoria pero que per primer vegada abre’l concursu de bandes –ésti ye’l sestu añu que se celebra– a otres cultures. Asina, amás de formaciones vasques y les dos asturianes, tamién aspiren a tocar nel EHZ grupos bretones, catalanes, corsos, galeses, gallegos, bereberes, kurdos, occitanos, quebequeses, samis, valdostanos, canacos y irlandeses.

La participación de La Tarrancha y Skontra produzse al traviés de la mediación d’Ixuxú Asturies-Euskal Herria elkartea, coleutivu formáu por emigrantes asturianos que busquen afitar pontes culturales ente los dos países. Pa poder entrar en concursu yera condición tener tola creación asoleyada con llicencia Creative Commons.

Conciertos de Skontra esta fin de selmana

La banda de punk-folk, que ta trabayando nos temes del que va ser el so discu próximu, torna a los escenarios esta fin de selmana pa ufrir dos conciertos. El primeru va tener llugar el vienres en L’Infiestu por mor del tercer aniversariu de la Cervecería La Traviesa, actuación que va principiar a les 22.30 hores. Mientres, el sábadu (23 hores), comparte cartelu con The Potes nel gaztetxe d’Elorrio (Bizkaia) con motivu de les fiestes de la 'calle del Río'. Dambos conciertos son de baldre.

 

Contador Estadistiques