El 48 por ciertu de los llectores d’Asturies.com nun cree que’l conflictu de Crimea acabe en guerra

La decisión de Crimea y Sebastopol de pasar a formar parte de la Federación Rusa nun va acabar en conflictu armáu pal 48 por cientu de los llectores d'Asturies.com que participaron nel nuesu ‘Conceyu Abiertu’. Un 35 por cientu opina lo contrario.

Esta república y ciudá autónomes con mayoría de población d’ascendencia rusa decidió’l 16 de marzu, por referéndum, independizase d’Ucrania, territoriu al que pertenecía dende’l 1954 cuando la URSS decidió tresferir esti territoriu a la República Soviética Socialista d’Ucrania –disuelta nel 1991–. El resultáu, que se dio a conocer al día siguiente, foi del 96,77 y del 95,6 por cientu, de manera respeutiva, con una participación superior al 80 por cientu. El 21 de marzu, Crimea y Sebastopol pasaben a formar parte de manera oficial de la Federación Rusa, dalgo que nun cuenta col sofitu de Naciones Xuníes y el refugu total d’Estaos Xuníos y la Xunión Europea.

Dende esa fecha hasta l’actualidá nun hebo nengún tipu d’ataque militar, anque sí movimientos de tropes cerca de les fronteras, sanciones a Rusia y frayamientu de rellaciones, sobre manera ente les dos potencies que protagonizaron la Guerra Fría. L’ausencia de conflictu armáu na zona ye dalgo que va caltenese pal 48 por cientu de los llectores d’Asturies.com, dalgo que nun considera asina un 35 por cientu de los nuesos usuarios. Mentes, un 17 por cientu afirma nun saber qué pasara nesta territoriu bañáu pol mar Prietu.

Otra manera, yá ye posible participar nun ‘Conceyu Abiertu’ nuevu. Nesta ocasión queremos conocer les espeutatives que tienen los nuesos llectores nes eleiciones al Parllamentu Européu, que n’Asturies y nel restu del Estáu van celebrase’l 25 de mayu.