Los trabayadores de la planta de Coca-Cola en Cualloto van dar aniciu’l llunes a una fuelga indefinida

|

El conceyu de trabayadores de Coca-Cola en Cualloto decidió siguir los pasos de les otres trés factoríes d’Iberian Partners amenazaes col zarru y entamar una fuelga indefinida a partir del llunes. Estos díes tán previstos paros parciales.

Los 144 emplegaos de la factoría asturiana de la marca famosa de refrescos paren güei u el xueves dos hores enantes de cada turnu y tienen previsto desplazase’l sábadu a Madrid pa participar nuna manifestación conxunta colos sos compañeros de Fuenlabrada, Alacant y Palma. Estes trés plantes, xunto cola asturiana, son les cuatro a les que l’embotellador Iberian Partners decidió proceder al so zarru dientro d’un plan de reorganización. Nel caso de Cualloto, foi la perxudicada de la zona norte peninsular, al caltenese abiertes les d’A Coruña y Bilbo.

El total de trabayadores afeutaos polos ERE previstos son 1.250 d’un total de 4.200 que la empresa tien en tol Estáu. La so intención ye dexar na cai a 750 trabayadores y treslladar a otros 500 a les siete plantes que continúen actives.

 

Contador Estadistiques