La XXI Bullada Purpurina de la Coordinadora Ecoloxista d’Asturies, p’Asturiana de Zinc

|

La Coordinadora Ecoloxista d’Asturies decicidó entregar la XXI Bullada Purpurina a Asturiana de Zinc (AZSA). La intoxicación con mercuriu de decenes de trabayadores y la contaminación que produz fáenla merecedora d’esti antipremiu.

Coincidiendo col 28 d’avientu, Día de los Santos Inocentes, la organización ecoloxista vien entregando dende hai ventiún años la Bullada Purpurina, ‘gallardón’ “que reconoz el llabor y aiciones d’empreses, instituciones y alministraciones que más destacaron nel so llabor en contra la conservación de la naturaleza y el mediu ambiente asturianu d’ente les munches candidatures que se presenten tolos años”. Nesta ocasión, los nominaos finalistes pa llevar l’antipremiu foron  la Confederación Hidrográfica del Cantábricu; la Xunta de Saneamientu d’Asturies; la Direición Xeneral de Mines; la conseyera d’Agroganadería y Recursos Autóctonos, María Jesús Álvarez; y AZSA, siendo esta última la merecedora de la Bullada Purpurina.  

Según espliquen dende la Coordinadora, AZSA trátase de “una de les empreses responsables de la grave contaminación ambiental que tenemos na zona central d’Asturias; una empresa ensin escrúpulos que permitió que decenes de trabayadores se contaminaren con mercuriu, material que ta matando silenciosa y impunemente a un montón de trabayadores y vecinos, al nun tomar les midíes preventives mientres una de les paraes de mantenimientu de la factoría”. La contaminación con esti metal diose pola so presencia nel aire, anque los ecoloxistes nun descarten que tea tamién presente “en cantidaes peligrosas nel agua, onde tolos años la empresa reconoz que  vierte fluoruros, zinc, plomu, níquel, cobre, cadmiu y arsénicu, amás de mercuriu”. “Si fallaron los controles de la empresa nel aire, ye evidente que tamién pudieron fallar los controles nes agües del procesu y los sos posteriores arramamientos qu’hasta agora se producen na zona. Si’l problema diose nes torres de mercuriu situaes enantes de los intercambiadores mientres les selmanes que tuvieron averiaes con conocimientu de la empresa, una parte d’esi mercuriu pudo arramase nel llaváu del  gas y llegar depués al efluente final, cola consiguiente contaminación de les algues, moluscos y pexes que tuvieron en contautu con esi mercuriu”, continúen.

Pero non sólo les crítiques son pa la empresa con factoría en San Xuan, sinó tamién pal Gobiernu: “A pesar de la gravedá de los fechos, el Principáu tapó l’episodiu minimizando la so importancia, faciendo de menos a los afeutaos reconocíos y a los vecinos de la redolada, que tán esmolecíos por cómo afeutó a la so salú esta situación grave”. Por último, la Coordinador desea “qu’esti ‘gallardón’ despierte de la febril ceguera a les diferentes alministraciones, que permiten que les empreses contaminen non sólo al so entornu, sinón a los sos trabayadores, sían propios o de subcontrates, con riesgu  grave pa les sos vides poles secueles que-yos supunxo esta contaminación que va hipotecar la so salú”. AZSA releva nel palmarés de la Bullada Purpurina a Asturgold, firma que pretende impulsar una mina d’oru en Tapia.

 

Contador Estadistiques