Principia n’Iruña La Vuelta, competición que sigue ensin respetar la toponimia oficial asturiana

Pese a que la organización de La Vuelta comprometióse col Gobiernu d’Asturies a utilizar la toponimia oficial del país, na so páxina web mantién los topónimos castellanizaos. Mañana principia la ronda ciclista n’Iruña con un prólogu.
 
Nel mes de xineru, la Direición de Política Llingüística, baxo’l mandatu de Foro Asturias Ciudadano, anunció’l compromisu d’Unipublic d’utilizar la toponimia oficial nes etapes asturianes tres mantener un contautu cola empresa organizadora de La Vuelta, que nesta edición celebra dos etapes peles carreteres asturianes. Sicasí, un día enantes del entamu de la ronda ciclista, la web de la ronda ciclista mantién los topónimos castellanizaos, yá nun oficiales nos conceyos que tienen aprobada la so toponimia tradicional, un total de 50 en tol país tres sumase recién a la llista Illas.
 
D’esta forma, nos medios de comunicación de tol mundu van visibilizase topónimos incorreutos como Cuitu Negru, en cuenta del oficial Cuitunigru; Gijón, en sustitución del oficial Gijón/Xixón; o l’Alto de Ortiguero por Ḥortigueru, ente otros munchos, como denunció nun primer momentu la Xunta pola Defensa de la Llingua Asturiana.
 
Froome y Contador, favoritos
 
No deportivo, La Vuelta va dar entamu mañana con un prólogu de 16,5 quilómetros per Iruña. El británicu d’orixe keniata Chris Froome (Team Sky) se presenta como’l favoritu principal pa llevase La Vuelta tres el segundu puestu en Le Tour y el bronce na prueba de contrarreló de London 2012. Sicasí, va tener que pelear duro Alberto Contador (Team Saxo Bank-Tinkoff Bank), que torna a la competición tres cumplir la sanción de dos años pol supuestu doping por clombuterol nel Tour del 2010. Mentes, Juanjo Cobo (Movistar Team) va tratar de repetir trunfu de La Vuelta tres la exhibición del añu pasáu, superando a Froome y a Wiggins na xeneral. La representación asturiana nesta edición de La Vuelta va tar formada por Benjamín Noval y Dani Navarro, ciclistes que van trabayar p’ayudar a Contador a llegar primeru a Madrid.
 
La ronda ciclista va llegar a Asturies el domingu 2 de setiembre dende La Robla, xornada con final nos Llagos d’Enol y La Ercina. Mentes, el llunes, va celebrase la etapa reina d’esta edición de La Vuelta: la que va xunir Xixón con Cuitunigru, altu inéditu nuna carrera profesional.

secciones: