El Festival Interceltique de Lorient del 2013 va tar dedicáu a Asturies

Dos años depués de refugar la invitación de la organización, Asturies va tornar a protagonizar el Festival Interceltique de Lorient. Nel 2013, les cais d’An Oriant van vistise d’azul y mariellu, tomando asina’l relevu de l’Acadie.
 
La noticia confirmóse ayeri per boca de Lisardo Lombardía, direutor del Interceltique, mientres la recepción qu’ufre l’Ayuntamientu d’An Oriant a toles delegaciones participantes. D’esta forma, el Gobiernu d’Asturies corrixe l’error cometíu nel 2011, cuando refugó ser el país convidáu del certame por motivos económicos, obligando a la direición del festival a improvisar y a dedicar esa edición a la diáspora celta. Hai que destacar que, en realidá, a Asturies tocaba-y protagonizar el festival, por rotación, nel 2010, pero al celebrase esi añu’l cuarenta aniversariu del eventu, adelantóse’l turnu de Breizh, país anfitrión.
 
El país convidáu n’An Oriant desplaza una delegación más amplia y tien un mayor espaciu pa colocar la so carpa, onde los miles de visitantes que s’averen al festival van poder conocer de primer mano la cultura, música, tradiciones y productos del país. L’Interceltique supón un escaparate de primer orde y xustifica la inversión qu’ha de facer el Gobiernu pa qu’Asturies sía’l país protagonista de la edición número 43 del certame, más si tenemos en cuenta les posibilidaes de comunicación qu’ufierta l’Autopista del Mar ente’l puertu d’El Musel y el de Naunnt-Saint-Nazère.
 
Otra manera, nestos momentos ta celebrándose la 42 edición del certame, onde Asturies ta representada pol Grupu de Baille Tradicional San Félix y les bandes de gaites de Candás y Villaviciosa. Amás, la programación del Interceltique tamién inclúi actuaciones de Tejedor y Xera. Los avilesinos, tres trunfar el domingu nel Espace Marine –escenariu principal del festival– xunto a la histórica orquesta cubana Buenavista Social Club, repiten esta nueche nel Grand Théâtre xunto a los galeses Calan.

secciones: