La reunión de la Mesa del Carbón finó ensin alcuerdu nengún

Pese a que de primeres paecía haber una bona disposición por parte del Gobiernu p’averar postures, la reunión de la Mesa del Carbón finó ensin alcuerdu nengún. Los sindicatos estudien la posibilidá de dexar la fuelga.
 
L’aconceyamientu, al qu’acudió’l Ministeriu d’Industria, Turismu y Comerciu, la patronal Carbounión y los sindicatos, nun tuvo’l desarrollu esperáu y terminó ensin alcuerdu “pola falta de racionalidá del Gobiernu”, según esplicó l’empresariu Victorino Alonso. L’Executivu refugó toles propuestes de CO OO, UXT y Carbounión, polo que nun se pudo desbloquiar el conflictu. La reunión próxima de la Mesa del Carbón podría tener llugar en setiembre.
 
Tres la reunión, los representantes sindicales aconceyáronse pa estudiar la situación actual y entamar a tomar decisiones. Los más de dos meses de fuelga y movilizaciones pasen factura a los trabayadores, más si se tien en cuenta la postura inamovible que mantién el Gobiernu, y ye posible que’l paru se desconvoque nos dies próximos. Nesi sen, los mineros d’Aragón tornaron ayeri al trabayu tres 65 xornaes de protesta por mor de la situación económica que viven dalgunes families depués dos meses ensin cobrar. Mentes, los de Palencia van principiar a trabayar mañana.

secciones: