Soldepaz Pachakuti recuerda al Gobiernu estatal la so responsabilidá pa col Sáḥara Occidental

La retirada de cooperantes del Sáḥara Occidental ordenada pol Gobiernu estatal por una inseguridá supuesta nel país africanu esmolez a Soldepaz Pachakuti. La ONG recuerda al Executivu la so responsabilidá pa cola ex colonia y la so población.
 
“Les esplicaciones daes son muy débiles y nun contrarresten la impresión d’abandonu del territoriu sobre’l qu’España tien la responsabilidá de la descolonización”, esplica nun comunicáu la xunta direutiva de Soldepaz Pachakuti. El sábadu pasáu foi’l día nel que’l Gobiernu estatal, al traviés del so ministru d’Esteriores, José Manuel García-Margallo, decidió repatriar –de manera voluntaria– a tolos cooperantes presentes nel Sáḥara Occidental escusándose n’informaciones llegaes a los servicios secretos occidentales nel terrén sobre un secuestru inminente que pretendíen entamar miembros de la organización Al Quaeda pal Magreb Islámicu en Mali: éstos taríen infiltraos nos campamentos de refuxaos de Tinduf. Asina, 12 persones tornaron a Europa, quedando namái nel país José Oropesa, que pa ello tuvo que firmar un documentu nel qu’esime al Gobiernu del Reinu d’España de toda responsabilidá sobre la so persona.
 
Munches de los cooperantes que volaren hacia l’Estáu español yá tienen programada la vuelta pal martes próximu, fecha na que la Coordinadora Estatal de les Asociaciones Solidaries col Sáhara (CEAS) entama un viaxe cola fin de nun abandonar l’ayuda a los refuxaos. Esta organización acusa al Gobiernu d’armar un montaxe pa infundir mieu y confirma que van ser 20 les persones que van desplazase a Tinduf pese a l’alarma, ente elles un asturianu, Javier González Vega, presidente del Observatoriu Asturianu de Derechos Humanos pal Sáḥara Occidental. “Enllénanos d’arguyu que la mayoría de les personas afectaes por esta repatriación manifestaren la so intención de tornar a cumplir coles sos tarees solidaries”, resalta Soldepaz Pachakuti, que llama al Gobiernu “a que permita eses actividaes, yá que la so ausencia supondría una vuelta de tuerca más a los oxetivos d’apropiación illegal del territoriu saḥaraui”.
 
“Lo que’l Gobiernu español tien la obligación de cumplimentar son toles iniciativas para que’l referéndum d’autodeterminación se propicie, el Sáḥara sía llibre y la población nun tenga que tar otros 35 años en campos de refuxaos”, reclama la ONG asturiana, que cree que la retirada de cooperantes de Tinduf favorez a Marruecos y trata de señalar oxetivos militaristes y coloniales.
 
Na semeya, García-Margallo, ministru d'Esteriores.

secciones: