Skip to content

Ecoloxistes n’Aición reclama qu’HC nun tea nun rexistru d’empreses que cumplen la llexislación ambiental

Xunetu 26, 2012 por Pablo R. Guardado

Tres los incidentes últimos rexistraos n’Aboño, Ecoloxistes n’Aición reclamó al ministeriu, a la conseyería y a AENOR, la salida d’HC del rexistru européu voluntariu EMAS. Ésti inclúi a les empreses que cumplen cola llexislación ambiental.
 
L’ Eco-Management and Audit Scheme (EMAS), o na so torna al asturianu, el Reglamentu Comunitariu d’Ecoxestión y Ecoauditoría, “ye una normativa voluntaria de la Xunión Europea que reconoz a aquelles organizaciones qu’implantaren un SXMA (Sistema de Xestión Medioambiental) y qu’adquirieren un compromisu de meyora continua, verificáu por auditoríes independientes”, según esplica la organización ecoloxista, que ta acabante de solicitar la cancelación del rexistru a Hidroeléctica del Cantábrico, S.A. Producción de Energía (númberu ES-SB- 000089). En concreto, Ecoloxistes n’Aición tresmitió la so quexa al Ministeriu d’Agricultura, Alimentación y Mediu Ambiente, a la Conseyería de Fomentu, Ordenación del Territoriu y Mediu Ambiente y a l’Asociación Española de Normalización y Certificación (AENOR).
 
Les razones que lleven a los ecoloxistes a dar esti pasu son los incidentes causaos pola térmica de la empresa de capital portugués n’Aboño. Según espliquen, el 20 de xunu denunciaron ante la conseyería una medra d’espuma na ría d’Aboño que procedía de “llabores de mantenimientu fechos por HC Energía na central térmica d’Aboño y a la puesta en marcha del so grupu más modernu de xeneración de carbón”, como confirmó la empresa nun informe solicitáu pol Conceyu de Carreño. Amás, HC Energía nun utilizó antiespumante, d’usu obligáu. Seis díes depués repetíase un episodiu contaminante, esta vegada d’una magnitú mayor: un vertíu de fuel llegaba a la mar y enllanaba de galipote playes como la de Xivares. “Amás del reconocíu retrasu n’informar a les autoridades, pudo haber incumplimientos nidios de les condiciones de l’Autorización Ambiental Integrada de la térmica, de forma especial la falta de separación ente’l sistema de recoyida d’agües pluviales y les agües marines de refrixeración, lo que, amás del incidente yá asocedío, nun garantiza que cualquier otru vertíu, accidental o pol simple arrastre d’aceites y grases, d’usu común, nun pueda terminar nel agua de la ría”, apunten dende Ecoloxistes n’Aición.
 
D’igual forma, esti coleutivu recuerda otros incidentes contaminantes provocaos por esta empresa n’otres zones n’años anteriores, como nel ríu Somiedu. “Ante esta situación, y siguiendo les instrucciones de procedimientu establecíes pol Ministeriu de Medio Ambiente, pidimos la cancelación de la inscripción d’esta compaía nel rexistru EMAS”, que supón la so baxa definitva nél y la perda del númberu de rexistru, “yá que, ente otros supuestos, esto ye lo que ha de facese nel casu de que ‘l’organismu competente fora informáu pola autoridá o autoridaes competentes pa facer cumplir la llexislación ambiental; del incumplimientu por parte de la organización de la llegislación vixente en materia de mediu ambiente’”.

Comparte...