Skip to content

‘Rock Estatal’ sitúa a Dixebra ente les cien bandes más destacaes de la primer década del sieglu

Xunetu 17, 2012 por Pablo R. Guardado

Coincidiendo col so décimu aniversariu, la revista ‘Rock Estatal’ espubliza esti mes un númberu especial nel qu’inclúi un reportaxe sobre les cien bandes más destacaes del sieglu. Los avilesinos Dixebra ocupen un puestu destacáu nella.
 
D’esta forma, la banda de rock n’asturianu apaez xunto a nomes históricos como Barricada, Barón Rojo, Celtas Cortos, Loquillo, Soziedad Alkóholika, Siniestro Total o Rosendo, ente otros. Amás, hai que destacar que Dixebra ye una de les poques bandes qu’ocupen una posición nel llistáu qu’utilicen una llingua estremada del castellanu, dándonse la circunstancia de que nengún grupu en gallegu o aragonés consiguiera abrise un güecu nesta rellación de formaciones escoyíes por periodistes especializaos y polos llectores de ‘Rock Estatal’. Nel casu del eusquera sí apaecen Berri Txarrak, Betagarri y Su Ta Gar, amás de Skalariak pese a canciar de manera principal en castellanu, y no que se refier al catalán, Obrint Pas –tamién el cantautor Albert Pla–.
 
Les persones que se faigan con esti númberu especial de la revista van atopar, xunto a una reseña sobre Dixebra, un pequeñu cuestionariu retrucáu polos miembros del grupu avilesín, esti añu habitual nes informaciones de la revista por mor de la presentación del discu ‘Dixebra XXV. 1987-2012’ y pol conciertu del 25 aniversariu celebráu na Sala Quattro en marzu. Los siguidores de Dixebra van poder presenciar un conciertu nuevu de la banda liderada por Xune Elipe’l sábadu 28 en Candás dientro del Rebolleres Rock, que pasa a celebrase en xunetu pa tapar el güecu dexáu pola Nueche Celta. Pa esta edición del festival, Dixebra va tar acompañáu del Grupu de Baille Tradicional San Félix y de les bandes Desakato y Skama la Rede.

Comparte...