El Gobiernu da anuncia de la xubida del IVA

 El ministru de Facienda y Alministraciones Públiques, Cristóbal Montoro, confirmó que'l Gobiernu trabaya nuna subida d'IVA que nun se taría discutiendo si l'impuestu “lu pagaren tolos que tienen que pagalo”.

   Asina lo señaló Montoro nel cursu de branu de la Universidá Complutense 'Entamadores autónomos: creadores d'empléu', onde tamién recordó qu'España tien una tasa d'IVA baxa en comparanza con otros países.
 
   Sicasí, tres la so intervención, el titular de la cartera de Facienda y Alministraciones Públiques concretó a los medios que'l Gobiernu tovía nun tien zarranda una fecha pa realizar esti cambiu.
  
  "Tamos falando", dixo Montoro, n'asegurando que'l Gobiernu va cumplir les conclusiones del Conseyu Européu, "como nun pue ser d'otra manera", y como tienen que facer tolos gobiernos y les instituciones europees pa salir cuanto antes de la crisis.  
 
   En tou casu, dexó claro que los encamientos europeos pasen per apoyar más la recaudación nos impuestos indirectos frente a los que gravan l'empléu, y que "ésti ye'l camín" pel qu'avanza'l Gobiernu.
 
   Otru de los oxetivos ye, según Montoro, avanzar na llucha contra'l fraude fiscal con un proyectu de llei qu'insiste na importancia d'evitar el fraude en tolos impuestos y, "de manera especial", nel IVA.
 
   Nesti sen, resaltó la importancia de "erradicar" les práctiques d'economía somorguiada "impropies" d'un país desarrolláu porque pue siguise faciendo la entruga "¿con IVA o ensin IVA?".

secciones: