L'Eurogrupu buscará un "acuerdu políticu" sobre'l rescate bancariu pa España

Los ministros d'Economía de la eurozona van buscar esti llunes un "acuerdu políticu" sobre'l memorandu coles condiciones del rescate a la banca española. Si algama un compromisu, el memorandu va rematase y va firmase a últimos de xunetu, pa que les ayudes entamen a llegar tres el branu.  

 
El contratu nun va incluyir la cifra final del préstamu porque l'Eurogrupu quier esperar al resultáu de les cuatro auditoríes sobre les necesidaes de capital bancu por bancu. Namás va mantenese'l nuevu tope de 100.000 millones d'euros que prometieron los socios de la eurozona pa la banca española, según esplicó un altu funcionariu del Eurogrupu.
 
   El borrador de memorandu negocióse nes últimes dos selmanes en Madrid poles autoridaes españoles y los espertos de la Comisión, qu'actuó en contactu permanente col Bancu Central Européu (BCE), l'Autoridá Bancaria y el Fondu Monetariu Internacional (FMI).
 
   Les condiciones centráronse en particular nel sector financieru. De primeres, van afectar a les entidaes que van recibir les ayudes, que tendrán que sometese a planes de reestructuración con venta d'activos, zarru d'oficines y segregación d'activos inmobiliarios, según dixo'l ministru d'Economía, Luis De Guindos. Pero tamién van cubrir al conxuntu del sector bancariu, con esixencies de refuerzu de la supervisión y la regulación.
 
   Nel memorandu tienen que figurar tamién les característiques del creitu, como'l plazu de devolución, el periodu de falta o'l tipu d'interés. Guindos espera que'l préstamu tenga "plazos llargos" de más de 15 años, un periodu de gracia ente cinco y diez años y tipos d'interés d'ente'l 3% y el 4%.
 
   Una vez firmáu'l memorandu, los fondos van inyectar nes entidaes con problemes siguiendo les regles vixentes, que nun prevén la recapitalización directa. Esto ye, el fondu de rescate tresferirá'l dineru al fondu ordenáu de reestructuración bancaria (FROB) y ésti de la mesma va dirixise a los bancos precisaos. El préstamu va computar como deuda nesta primer fase.
 
   "Los primeros bancos españoles precisen que los recapitalicen na seronda d'esti añu y los otros, munchos otros, en primavera del añu qu'entra", aseguró l'altu funcionariu del Eurogrupu.
   La recapitalización directa namás va ser posible cuando se creara un supervisor únicu a partir del Bancu Central Européu. Anque los líderes de la eurozona comprometiéronse a qu'ello se faiga  primero qu'acabe l'añu, les fontes consultaes creen que podría retrasase a mediaos del 2013 o hasta'l 2014, fecha na que yá remataría'l plan de rescate español.
 
   Sicasí, nesi momentu, los préstamos a la banca española van dexar de contar como deuda pal Estáu, pero España va caltenese como garante. Ello significa que si les entidaes nun los devuelven, l'Estáu tendrá qu'asumir les perdes y non el fondu de rescate.
 
Prórroga pal déficit
 
   Na axenda del Eurogrupu nun ta previsto debatir la posibilidá de dar un añu de prórroga a España (hasta'l 2014 en llugar del 2013) pa reducir el déficit hasta'l 3% del PIB. Sobremanera porque la Comisión tovía nun presentó una propuesta formal nesti sen.
 
   "Nun pueo confirmar nesti momentu que la Comisión tea preparada pa facer esi encamientu al Conseyu", dixo'l voceru d'Asuntos Económicos, Simon O'Connor.
 
   Sicasí, l'Executivu comunitariu recordó que'l Gobiernu tien que cumplir una serie de condiciones si quier beneficiase d'esti añu de prórroga, que yá avanzó'l vicepresidente Olli Rehn el pasáu 30 de mayu.
 
   La primer condición ye que'l Gobiernu de Mariano Rajoy presente "un plan presupuestariu sólidu pal 2013 y 2014 que detalle la senda al mediu plazu de consolidación presupuestaria", esplicó Rehn. Amás, España tien que dar garantíes de que "pue controlar de forma eficaz el gastu escesivu a nivel subnacional, especialmente nes comunidaes autónomes".
 
   Los ministros d'Economía de la eurozona tienen previsto debatir amás la situación en Grecia, pendiente de renegociar el so segundu rescate, y en Chipre, que pidió tamién asistencia financiera. En nengún de los dos casos esperen decisiones hasta últimos de branu, según les fontes consultaes.