Skip to content

El PP rexistra na Xunta Xeneral delles preguntes sobre'l "grave" vertíu d'Aboño

Xunetu 5, 2012 por E.P. / Redacción

La vocera de Mediu Ambiente del Partíu Popular na Xunta Xeneral d'Asturies, Victoria Delgado, xunto al parlamentariu Matías Rodríguez, voceru del PP na Comisión de Presidencia, rexistraron nel Parlamentu una batería de preguntes sobre'l "grave" vertíu asocedíu na ría d'Aboño'l pasáu 26 de xunu dirixíes al Conseyu de Gobiernu, pa la so respuesta per escrito.
 

   Según informó'l Partíu, los diputaos populares esperen que les respuestes del Executivu se producan "cuanto antes, dada la difícil situación na que s'alcuentra'l conceyu de Carreño, con cinco playes zarraes al bañu, y l'afección sufrida n'arenales de Xixón, Villaviciosa, Caravia y Ribeseya".
 
    Coles mesmes, el Grupu Parlamentariu Popular solicitó yá la comparecencia nes comisiones correspondientes de los conseyeros de Fomentu, Ordenación del Territoriu y Mediu Ambiente, Belén Fernández, y el titular de Presidencia, Guillermo Martínez, y presentó una interpelación al Conseyu de Gobiernu sobre esti mesmu asuntu pal so debate en Plenu.  
  
   El Partíu Popular, al traviés del so Grupu na Xunta, comprometióse tamién a esixir en sede parlamentaria l'arreglu medioambiental de les zones afectaes pola fuga de fuel-oil y a solicitar les compensaciones económiques a qu'hubiera llugar pa los colectivos afectaos por "esti grave derrame", rellacionaos fundamentalmente cola pesca y el turismu.
 
   "Nun hai qu'olvidar que'l vertíu produzase nel entamu de la temporada de branu, colos perxuicios económicos qu'ello va conllevar nel sector turísticu de los estos conceyos, integráu sobremanera por autónomos y pymes", indicó Delgado.

Comparte...