Skip to content

El Primer Sol Celta vien a sustituyir al festival intercélticu avilesín Beltaine

Xunu 27, 2012 por Pablo R. Guardado

El festival intercélticu impulsáu pol Conceyu d’Avilés, el Beltaine, namái tuvo trés años de vida. Esti xunetu nun va celebrase y, nel so llugar, Ayuntamientu y hosteleros y comerciantes del centru van entamar el Primer Sol Celta.
 
Esti cambiu vien por mor de la falta de presupuestu pa entamar una edición nueva del Beltaine, certame organizáu pola Federación Xuntanza de Avilés y Comarca y impulsáu pol Conceyu d’Avilés pese a la esistencia del yá consolidáu Festival Intercélticu d’Avilés y Comarca (FIAyC), entamáu pola Asociación Cultural Esbardu, una decisión que nunca s’acabó por entender. Como solución d’última hora pa sustituyir al Beltaine, hosteleros y comerciantes de les cais El Sol y Alfonso VI, xunto col conceyal de Cultura, Román Antonio Álvarez, decidieron entamar un festival nuevu que lleva’l nome de Primer Sol Celta. Ésti va celebrase nel centru históricu de la ciudá ente’l 9 y el 15 de xunetu y nél van actuar namái bandes asturianes: Barrocko Project y DRD (llunes 9); Mari Luz Cristóbal, la Bandina de Rubén Alba y Tuenda (martes 10); Rafa Kas, El Pola y el duu Anabel Santiago y Héctor Braga (miércoles 11); la Bandina de Rubén Alba y Verdasca (xueves 12); La Bandina La Curuxa y N’Arba (vienres 13); Degaña’s y Xéliba (sábadu 14); y Nuva Música Antigua (domingu 15). Amás, va instalase un mercadín y habrá delles actividaes a lo llargo de la selmana, ente les que destaca un desfile de Los Sidros previstu pa la xornada cabera.
 
Mentes, el Centru Niemeyer va acoyer esti añu del 16 al 22 de xunetu –adelanta feches pa nun coincidir col Festival Arcu Atlánticu de Xixón impulsáu por Carlos Rubiera y el gobiernu municipal de Foro– les actividaes del Intercélticu d’Esbardu, que cumple yá 16 años. El saltu al recintu diseñáu pol arquitectu brasileñu va permitir al FIAyC contar esti añu con un cartelu mui potente nel que destaquen l’actuación de la bretona Gweenyn (xueves 19 de xunetu), un conciertu de Carlos Núñez xunto a Dan Ar Braz (vienres 20) y el del gaiteru escocés Fred Morrison y la banda canadiense La Bottine Souriante (sábadu 21), ente otros.

Comparte...