Asturies.com ufre una galería de semeyes del festival 'Máscara Ibérica' y de la esposición de Xixón

|

Con motivu de la llegada de la esposición itinerante ‘Máscara Ibérica’ al Pueblu d’Asturies, Asturies.com ufre una galería con semeyes de la muestra y del festival de mesmu nome de Lisboa. Iván G. Fernández ye l’autor de toles fotografíes.
 
El Festival Internacional Máscara Ibérica (FIMI) de Lisboa, qu’esti añu vivió la so sétima edición, ye’l certame más importante que se celebra nel mundu alredor de la tradición de les mazcaraes d’iviernu. Miles de persones s’averen a la capital portuguesa pa presenciar les munches actividaes que se programen a lo llargo de cuatro díes y que tienen como platu fuerte’l desfile, nel qu’esti añu participaron 21 mazcaraes de Portugal, Galicia, Asturies, Lleón, Zamora, Salamanca, Cáceres y Nafarroa. Nesta edición, el nuesu país tuvo representáu por Los Sidros y Les Comedies de Valdesoto y Os Reises d’El Valledor, que dexaron el pabellón bien altu, como amuesen les semeyes feches por Iván G. Fernández.
 
La galería de fotografíes complétase con una pequeña muestra de lo que los visitantes qu’acudan al Muséu del Pueblu d’Asturies van poder ver na esposición itinerante ‘Máscara Ibérica’ qu’entama, al igual que’l festival lisboeta, Progestur, y qu’aporta a Xixón tres pasar per Lisboa, Terceira, Zamora, Porto, Coimbra y Faro. Ésta va tar abierta al públicu hasta’l 30 de setiembre y trátase d’una perbona ocasión pa conocer esta tradición tán prestosa que tovía se mantién viva en dellos puntos d’Asturies.

Contador Estadistiques