Skip to content

L’Asturies futbolística despide a Manuel Preciado n’El Molinón

Xunu 13, 2012 por Pablo R. Guardado

Alredor de 8.000 persones acudieron el martes a El Molinón a la misa-homenaxe a Manuel Preciada oficiada por Fernando Fueyo. Aficionaos al fútbol de toda Asturies y de Cantabria nun quixeron faltar a esta emotiva despidida.
 
Foi un actu emotivu qu’enxamás van escaecer les miles de persones qu’abarrotaron la Tribunona –namái dexaron ensin enllenar una parte de la esquina sur–, con capacidá pa 8.000 persones, nin Manu, fíu de Preciado, nin Arancha, esposa actual del cántabru. Dende media hora enantes de la hora prevista d’entamu, el Coru Manín, de Llastres, amenizó la espera a los munchos aficionaos que yá poblaben la grada oeste del centenariu estadiu xixonés. Munchos vistíen los collores roxiblancos del Sporting, anque tamién se dexaba ver dalguna camiseta del Racing, equipu del alma de Preciado al que defendió como xugador y entrenador.
 
Tres un desfile de banderes por parte d’Ultra Boys, grupu que se situó nel Fondu Mozu, Fueyo dio entamu al actu llitúrxicu, nel que participó'l defensa del Sporting, Iván Hernández. La misa, amenizada poles voces del coru llastrín y por Joaquín Pixán, nun tuvo’l silenciu habitual de les celebraciones relixoses, yá que’l públicu rompió a aplaudir en dellos momentos. El momentu más emotivu foi cuando, na parte final, el capellán del Sporting pidió un aplausu pa Preciado y el públicu reaccionó con un homenaxe de más de cinco minutos pal d’Astillero.
 
Tres finalizar la misa, el Sporting emitió un vidiu con pallabres de Preciado nel marcador que fixo saltar les llárimes a munchos, al igual que’l cantar que Pipo Prendes compuso al que fora entrenador del Sporting per cinco años y mediu. Un broche d’oru a una xornada que va permanecer na memoria de l’Asturies futbolística per siempre.

Comparte...